ຄວາມຄືບໜ້າ ໂຄງການກໍ່ສ້າງ ລະບົບນ້ຳລິນ ບ້ານ ໜອງຫຼວງ ກຸ່ມ ນ້ຳອຸ່ນ ເມືອງຄູນ
ໂດຍ: ນາງ ແວວ ທລຍ ເມືອງຄູນ
ບ້ານ ໜອງຫຼວງ ແມ່ນບ້ານໜຶ່ງທີ່ຂຶ້ນກັບກຸ່ມ ນ້ຳອຸ່ນ ເມືອງຄູນ ແຂວງຊຽງຂວາງ ປະກອບມີ 72 ຫຼັງຄາ,ພົນລະເມືອງທັງໝົດ 308 ຄົນ,ຍິງ 171 ຄົນ ເປັນບ້ານຊົນເຜົ່າກຶມມຸ ແລະ ເຜົ່າມົ້ງ ຢູ່ຮ່ວມກັນດ້ວຍຄວາມສາມັກຄີ ອາຊີບຕົ້ນຕໍຂອງເຂົາເຈົ້າ ແມ່ນ ເຮັດນາ, ສ່ວນປູກຝັງ ແລະ ລ້ຽງສັດ,ເປັນອາຊີບສຳຮອງ ໃນເມື່ອກ່ອນບ້ານ ໜອງຫຼວງ ແມ່ນ ມີຄວາມຫຍຸ້ງຍາກຫຼາຍ ບໍ່ມີນ້ຳສະອາດຊົມໃຊ້,ຜູ້ຍິງ ແລະ ເດັກນ້ອຍຕ້ອງໄດ້ໄປຕັກນ້ຳຢູ່ໄກ,ເສຍເວລາໃນການທຳການຜະລິດ ແລະ ຍາມລະດູຝົນແມ່ນມັກເກີດພະຍາດຖອກທ້ອງ.
ຕົກມາຮອດ ຮອບວຽນທີ 13 ສົກປີ (2015-2016) ທລຍ ໄດ້ສະໜອງທຶນໃນການກໍ່ສ້າງລະບົບນ້ຳລິນໃຫ້ ມີຄວາມຍາວທັງໝົດ 6,400 ແມັດ, ລວມມີ 10 ກັອກ ເຊິ່ງໄດ້ລົງມືກໍ່ສ້າງໃນວັນທີ່ 24/04/2016,ມູນຄ່າຂອງການກໍ່ສ້າງທັງໝົດແມ່ນ 374, 923,295ກີບ ໃນນັ້ນຊຸມຊົນປະກອບສ່ວນແຮງງານ ແລະ ວັດຖຸທ້ອງຖິ່ນ ຄິດເປັນມູນຄ່າ 57,150,000 ກີບ, ປະຈຸບັນການກໍ່ສ້າງແມ່ນສໍາເລັດແລ້ວ 95% ແລະ ຄາດວ່າຈະໃຫ້ສຳເລັດພາຍໃນເດືອນມິຖຸນາ 2016 ນີ້.
ທ່ານ ຄຳເສັງ ນາຍບ້ານ ໜອງຫຼວງ ພ້ອມດ້ວຍພໍ່ແມ່ປະຊາຊົນພາຍໃນບ້ານໝົດທຸກຄົນໄດ້ກ່າວວ່າ: “ມີຄວາມພາກພູມໃຈຫຼາຍທີ່ທາງ ທລຍ ໄດ້ໃຫ້ທຶນສະໜັບສະໜູນໃນການກໍ່ສ້າງ ລະບົບນ້ຳລິນໃຫ້ ເພາະວ່າຊາວບ້ານ ຈະສະດວກສະບາຍໃນການນຳໃຊ້ລະບົບນ້ຳລິນ, ຫຼຸດຜ່ອນເວລາ ແລະ ແຮງງານ ທີ່ໄດ້ໄປຕັກນ້ຳຢູ່ໄກ,ໄດ້ໃຊ້ນ້ຳທີ່ສະອາດ,ຫຼຸດຜ່ອນການເກີດພະຍາດຖອກທ້ອງ ແລະ ຂໍສະແດງຄວາມຂອບໃຈອັນລົ້ນເຫຼືອມາຍັງພັກ-ລັດ ກໍຄື ທລຍ ທີ່ໄດ້ເອົາໃຈໃສ່ເບິ່ງແຍງ ພວກຂ້າພະເຈົ້າ ພ້ອມແລ້ວທີ່ຈະເອົາໃຈໃສ່ໃນການປົກປັກຮັກສາ,ສ້າງກອງທຶນໃນການຄຸ້ມຄອງ ເພື່ອໃຫ້ໂຄງການມີຄວາມຍືນຍົງ ແລະ ນຳໃຊ້ໄດ້ຕະຫຼອດໄປ“.
