13 ປີ ເມືອງວິລະບູລີ ກັບການພັດທະນາ ພາຍໃຕ້ການຊ່ວຍເຫລືອຂອງ ທລຍ
ໂດຍ: ທລຍ
ວິລະບູລີແມ່ນ ໜຶ່ງໃນ 5 ເມືອງ ຂອງແຂວງສະຫວັນນະເຂດ ທີ່ ທລຍ ເຂົ້າໄປຊ່ວຍພັດທະນາແກ້ໄຂຄວາມ ທຸກຍາກ ນັບຕັ້ງແຕ່ປີ 2004 ເປັນຕົ້ນມາ. ກ່ອນທີ່ ທລຍ ບໍ່ທັນໄດ້ເຂົ້າມາຊ່ວຍເຫລືອ ເມືອງວິລະບູລີ ເປັນເມືອງໜື່ງທີ່ນອນໃນ 47 ເມືອງທຸກຍາກທີ່ສຸດໃນ ສ ປ ປ ລາວ, ແຕ່ໄດ້ປະກາດເປັນເມືອງພົ້ນທຸກແລ້ວ ໃນ ວັນທີ 29 ພຶດສະພາ 2015 ຜ່ານມາ.
ອີງໃສ່ລະດັບຄວາມທຸກຍາກຢູ່ເມືອງອື່ນໆພາຍໃນແຂວງຍັງມີສູງ ສະນັ້ນ, ອຳນາດການປົກຄອງທ້ອງຖິ່ນແຂວງສະຫວັນນະເຂດ ຈຶ່ງເຫັນດີໃຫ້ ທລຍ ເຂົ້າໄປຊ່ວຍເຫລືອພັດທະນາຢູ່ເມືອງອາດສະພອນ ແທນ ເມືອງວິລະບູລີ.ດັ່ງນັ້ນ, ໃນວັນທີ 30/6/2017 ກອງປະຊຸມ ມອບ-ຮັບ ໂຄງການ ໄດ້ຈັດຂື້ນຢ່າງເປັນທາງການ ໂດຍການໃຫ້ກຽດເປັນປະທານຂອງ ທ່ານ ບົວສອນ ມະຫາວົງ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້ງເມືອງໆ ວິລະບຸລີ ແລະ ໃຫ້ກຽດ ເປັນຄະນະປະທານຮ່ວມຂອງ ທ່ານ ບຸນກວ້າງ ສຸວັນນະພັນ ຜູ້ອໍານວຍການ ກອງທຶນຫຼຸດຜ່ອນຄວາມທຸກຍາກ ແລະ ທ່ານ ສຸບິນ ຫຼວງດ້ວງ, ຫົວໜ້າຂະແໜງພັດທະນາຊົນນະບົດ, ພະແນກກະສິກໍາ-ປ່າໄມ້ແຂວງສະຫວັນນະເຂດ ແລະ ໂດຍການເຂົ້າຮ່ວມຂອງ ອໍານາດການປົກຄອງເມືອງ, ຂະແໜງການທີ່ກ່ຽວຂ້ອງຂັ້ນແຂວງ, ແລະ ຄະນະພັກຮາກຖານກຸ່ມບ້ານ ແລະ ພະນັກງານ ທລຍ ເຂົ້າຮ່ວມ ທັງໝົດ 58 ທ່ານ ຍິງ 11 ທ່ານ.
ຕະລອດໄລຍະ 13 ປີ ທີ່ ທລຍ ໄດ້ນຳໃຊ້ງົບປະມານທັງໝົດ 27ຕື້300 ລ້ານກວ່າກີບ ທຶນປະກອບສ່ວນຂອງຊຸມຊົນ2,632,054,268ກີບ ລວມທັງໝົດ 29,935,060,803ກີບ ເພື່ອຈັດຕັ້ງປະຕິບັດ 209 ໂຄງການ ໃນນັ້ນຂະແໜງ ກະສິກໍາ ມີຈໍານວນ 29 ໂຄງການ ງົບປະມານທັງໝົດ 1.771.300.000 ກີບ
- ຂະແໜງ ສາທາລະນະສຸກ ຈໍານວນ 60 ໂຄງການ ງົບປະ ມານທັງໝົດ 9.371.200.000 ກີບ
- ຂະແໜງ ສືກສາທິການ ແລະ ກິລາ 69 ໂຄງການ ງົບປະມານທັງໝົດ 12.035.700.000 ກີບ
- ຂະແໜງ ໂຍທາທິການແລະ ຂົນສົ່ງ 64ໂຄງການ ງົບປະ ມານທັງໝົດ 6.532.500.000ກີບ
- ແລະ ອື່ນໆ ຈໍານວນ 7 ໂຄງການ ງົບປະມານທັງໝົດ 224.400.000 ກີບ.
ທີ່ກອງປະຊຸມຄັ້ງນີ້ມີຫລາຍພາກສ່ວນໄດ້ມີຄໍາເຫັນກ່ຽວກັບ ຜົນສໍາເລັດໃນການຈັດຕັ້ງປະຕິບັດຂອງ ທລຍ ທີ່ໄດ້ມີບົດບາດໃນການຜັກດັນຊ່ວຍໃຫ້ ແຕ່ລະຂະແໜງການໄດ້ຮັບຜົນສໍາເລັດ ເປັນຕົ້ນ ທ່ານ ຫົວຫນ້າ ຫ້ອງການສືກສາເມືອງວິລະບູລີ ໄດ້ມີຄໍາເຫັນວ່າ ຍ້ອນ ທລຍ ໄດ້ສ້າງໂຮງຮຽນ ຢູ່ທຸກບ້ານເປົ້າໝາຍ ເຮັດໃຫ້ ລູກຫຼານຂອງພໍ່່ແມ່ປະຊາຊົນ ໂດຍສະເພາະໃນເຂດຫ່າງໄກສອກຫຼີກ ສາມາດເຂົ້າເຖີງການສືກສາ, ແກ້ໄຂບັນຫາເດັກນ້ອຍໃນເກນອາຍຸ ແຕ່ບໍ່ໄດ້ເຂົ້າໂຮງຮຽນຍ້ອນບໍ່ມີໂຮງຮຽນ. ບາງທ່ານເວົ້າວ່າ ໂຄງການທີ່ ທລຍ ໃຫ້ການຊ່ວຍເຫລືອເຖິງວ່າເປັນໂຄງການຂະໜາດນ້ອຍແຕ່ກຸ້ມຄ່າຫລາຍ.
ທ່ານ ບົວສອນ ມະຫາວົງ ກໍາມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້ງເມືອງໆວິລະບູລີ ໄດ້ກ່າວວ່າ: ການຈັດຕັ້ງປະຕິບັດຂອງ ທລຍ ມີຄວາມໂປ່ງໃສ ສາມາດກວດສອບໄດ້, ລະບົບການປະສານກັບຂະ ແໜງການຕ່າງໆແມ່ນໄດ້ດີ, ໄດ້ສົ່ງເສີມບົດບາດຍິງ-ຊາຍ ເຮັດໃຫ້ແມ່ຍິງ ແລະ ຊົນເຜົ່າ ມີຄວາມກ້າຫານ ກ້າສະແດງອອກໃນເວທີຕ່າງໆ ເປັນຕົ້ນແມ່ນການນໍາສະເໜີ ແລະ ປ້ອງກັນເອົາບຸລິມະສິດຄວາມຕ້ອງການ ກຸ່ມບ້ານຂອງຕົນ ຢູ່ກອງປະຊຸມປະສານງານການວາງແຜນຂັ້ນເມືອງ, ຫລາຍໆດ້ານທີ່ ທລຍ ຈັດຕັ້ງປະຕິບັດແມ່ນສາມາດເອົາເປັນຕົວແບບໃຫ້ແກ່ອໍານາດການປົກຄອງທ້ອງຖິ່ນພວກເຮົາ ເຊັ່ນ: ການເຮັດວຽກຢ່າງມີຫລັກການ, ມີລະບົບການປະສານງານບ້ານ, ກຸ່ມບ້ານ, ເມືອງ ທີ່ດີ, ມີຄວາມໂປ່ງໃສໃນການຈັດຕັ້ງປະຕິບັດ..
ທ່ານ ບົວສອນ ມະຫາວົງ ກ່າວຕື່ມວ່າ: “ທລຍ ເປັນກົງຈັກທີ່ບໍ່ໃຫຍ່ ມີລັກສະນະກະຖັດຫັດແຕ່ມີຄວາມເຂັ້ມແຂງໜັກແໜ້ນດ້ານແນວຄິດ ແລະ ການກະທໍາໂຕຈິງ ມີຄວາມຕັດສິນໃຈສູງ ບ່ອນທຸກຍາກຫ່າງໄກສອກຫລີກກໍ່ໄປເຖິງ. ສະນັ້ນ, ຈຶ່ງເຮັດໃຫ້ປະຊາຊົນຜູ້ທຸກຍາກຫ່າງໄກສອກຫລີກສາມາດເຂົ້າເຖິງການບໍລິການຂັ້ນພື້ນຖານດ້ານຕ່າງໆຢ່າງທົ່ວເຖິງ, ທັງໝົດເຫລົ່ານັ້ນໄດ້ປະກອບສ່ວນໃຫ້ແກ່ການພັດທະນາດີຂຶ້ນເປັນກ້າວໆ ແລະ ໄດ້ກາຍເປັນປັດໃຈພື້ນຖານ ໃຫ້ແກ່ເມືອງວິລະບູລີ ຂອງພວກເຮົາ ປະກາດເປັນເມືອງພົ້ນທຸກໃນ ວັນທີ 29 ພຶດສະພາ 2015 ເຊິ່ງຖ້າທຽບໃສ່ກ່ອນ ທລຍ ບໍ່ທັນເຂົ້າເມືອງພວກເຮົານອນຢູ່ໃນ 47 ເມືອງທຸກຍາກ ແລະ ປະຈຸບັນນີ້ພວກເຮົາ ກຳລັງກະກຽມເງື່ອນໄຂດ້ານຕ່າງໆ ເພື່ອໃຫ້ກາຍເປັນເມືອງເຂັ້ມແຂງຮອບດ້ານໃນອະນາຄົດ.”
