ນັກຮຽນເຂດຊົນນະບົດຫ່າງໄກສອກຫລີກເປົ້າໝາຍຂອງ ທລຍ ໄດ້ຮັບເຄື່ອງຊ່ວຍເຫລືອຈາກສະມາຄົມສົ່ງເສີມເດັກນ້ອຍລາວຈາກປະເທດຍີ່ປຸ່ນ
ໂດຍ: ແສງອາລຸນ ພິລາຈັນ
ແຂວງຜົ້ງສາລີເປັນແຂວງພູດອຍທີ່ຕັ້ງຢູ່ເໜືອສຸດຂອງປະເທດລາວ ມີເສັ້ນທາງຄົມມະນາຄົມໄປມາຫາກັນມີຄວາມຫຍຸ້ງຍາກຫລາຍ, ບ້ານແຕ່ລະບ້ານແມ່ນຫ່າງໄກສອກຫລີກ, ຕັ້ງຢູ່ລະດັບ 350 ແມັດ ເໜືອນໍ້າທະເລ ຂື້ນໄປ 1500 ແມັດປະກອບມີ 7 ເມືອງ ໃນນັ້ນມີ 5 ເມືອງທຸກຍາກ (71%), 64 ກຸ່ມບ້ານ, 536 ບ້ານ, ບ້ານທຸກຍາກ 353 ບ້ານ (65%), 30,446 ຄອບຄົວ, ຄອບຄົວທຸກຍາກ 11,717 ເທົ່າກັບ 38%, ມີພົນລະເມືອງ 172,687 ຄົນ, ຍິງ 86,466 ຄົນ, ມີ 15 ຊົນເຜົ່າ.
ເຊິ່ງໃນນັ້ນເມືອງທີ່ ທລຍ ກຳລັງໃຫ້ການຊ່ວຍເຫລືອຢູ່ແຂວງຜົ້ງສາລີ ປະກອບມີ 3 ເມືອງຄື: ເມືອງຂວາ, ເມືອງໃຫມ່ ແລະ ເມືອງສຳພັນ ລວມທັງໝົດ 19 ກຸ່ມບ້ານ, 161 ບ້ານທຸກຍາກ, 8,265 ຄົວເຮືອນ, 11,816 ຄອບຄົວ, ຄອບຄົວທຸກຍາກ 5,164 (43%), ພົນລະເມືອງທັງໝົດ: 48,655 ຄົນ, ຍິງ 24,043 ຄົນ.
ແຂວງດັ່ງກ່າວເປັນໜຶ່ງໃນ 10 ແຂວງເປົ້າໝາຍຂອງ ທລຍ ທີ່ກໍາລັງໃຫ້ການຊ່ວຍເຫລືອຢູ່ ໃນນັ້ນ ສໍາລັບສົກປີ 2012- 2013 ທລຍ ໄດ້ສະໜັບສະໜູນໃຫ້ແກ່ແຂວງດັ່ງກ່າວທັງໝົດ 25 ໂຄງການ ໂດຍກວາມເອົາ 4 ຂະແໜງການທີ່ກ່ຽວຂ້ອງ ໄດ້ແກ່: ສຶກສາທິການ ແລະ ກິລາ, ສາທາລະນະສຸກ, ກະສິກໍາ ແລະ ປ່າໄມ້, ໂຍທາທິການ ແລະ ຂົນສົ່ງ ໂດຍນໍາໃຊ້ງົບປະມານທັງໝົດ 5 ຕື້ກີບ ເຊິ່ງມາຮອດປະຈຸບັນ ໄດ້ສໍາເລັດແລ້ວ 8 ໂຄງການ ແລະ ສ່ວນທີ່ເຫລືອແມ່ນມີຄວາມຄືບໜ້າຫລາຍກວ່າ 50% ແລະ ຄາດວ່າຈະໃຫ້ສໍາເລັດໃນໄວໆນີ້.
ເມື່ອເວົ້າເຖິງການສຶກສາແລ້ວ ເມືອງໃໝ່ ເປັນເມືອງໜຶ່ງທີ່ ທລຍ ໄດ້ເອົາໃຈໃສ່ ຊຸກຍູ້ ສົ່ງເສີມມາຕະຫລອດ ແລະ ຫາແຫລ່ງທຶນຈາກພາຍໃນ ແລະ ສາກົນ ມາຊ່ວຍເຫລືອເມືອງດັ່ງກ່າວ. ບ້ານ ຕີນຕົກ, ກຸ່ມເພຍເລາະເກົ່າ, ບ້ານ ນາລໍາ, ກຸ່ມບ້ານນາລໍາ ທັງ 2 ບ້ານ ເປັນບ້ານທີ່ຕັ້ງຢູ່ເຂດຫ່າງໄກສອກ ຫລີກ ທຸລະກັນດານທີ່ສຸດ ແລະ ຍາກລໍາບາກຫລາຍທີ່ຈະເຂົ້າໄປໃຫ້ການຊ່ວຍເຫລືອ ເຊິ່ງສະແດງໃຫ້ເຫັນໃນເວລາທີ່ ທ່ານ ສົມຊາຍ ຄໍາທະມາ, ຜູ້ຕາງໜ້າສະມາຄົມສົ່ງເສີມເດັກນ້ອຍລາວທີ່ປະເທດຍີ່ປຸ່ນ ໂດຍປະສານສົມທົບກັບ ທ່ານ ບຸນກວ້າງ ສຸວັນນະພັນ, ຜູ້ອໍານວຍການບໍລິຫານ ກອງທຶນຫລຸດຜ່ອນຄວາມທຸກຍາກ (ທລຍ) ລົງໄປມອບ ເຄື່ອງນຸ່ງຮົ່ມຈາກປະເທດຍີ່ປຸ່ນ ໃຫ້ແກ່ນ້ອງນ້ອຍນັກຮຽນ ແລະ ປະຊາຊົນທີ່ທຸກຍາກຫ່າງໄກສອກຫລີກ ຢູ່ 2 ບ້ານດັ່ງກ່າວ ໃນວັນທີ 25-26 ກັນຍາ 2013 ໂດຍການເຂົ້າຮ່ວມເປັນສັກຂີພະຍານຂອງ ທ່ານ ອໍາໄພ ຫລ້າດວງພັນ, ຮອງຫົວໜ້າກົມບັນດາເຜົ່າ, ຄະນະກໍາມາທິການບັນດາເຜົ່າ ສະພາແຫ່ງຊາດ, ທ່ານ ບຸນຈັນ ໄມຕວນ, ຮອງເລຂາພັກເມືອງ ຮອງເຈົ້າເມືອງ ເມືອງໃໝ່, ພະນັກງານ ທລຍ ສູນກາງ, ແຂວງ ແລະ ເມືອງ ແລະ ຕະຫລອດຮອດອໍານາດການປົກຄອງບ້ານ ແລະ ພໍ່ແມ່ປະຊາຊົນ ເຂົ້າຮ່ວມເປັນຈໍານວນຫລວງຫລາຍ.
ບ້ານ ຕີນຕົກ, ກຸ່ມເພຍເລາະເກົ່າ ເມືອງໃໝ່ ເປັນບ້ານຊົນເຜົ່າຂະມຸ ປະກອບມີພົນລະເມືອງທັງໝົດ 256 ຄົນ, ຍິງ 181 ຄົນ, ເດັກອາຍຸຕໍ່າກວ່າ 15 ປີ ມີ 98 ຄົນ, 63 ຄອບຄົວ,ໃນນັ້ນມີ ຄອບຄົວທຸກຍາກ 28 ຄອບຄົວ, ອາຊີບຕົ້ນຕໍແມ່ນເຮັດໄຮ່ ເປັນບ້ານໜຶ່ງທີ່ຕັ້ງຫ່າງຈາກເທດສະບານເມືອງພຽງແຕ່ 17 ກິໂລແມັດ ແຕ່ເສັ້ນທາງໃນການເຂົ້າເຖິງແມ່ນຫຍຸ້ງຍາກຫລາຍ ເພາະທາງເປັນບວກ ເປັນຕົມເລີກ ຖ້າຈະເຂົ້າໄປຫາບ້ານດັ່ງກ່າວ ຕ້ອງເດີນທາງໂດຍລົດກະບະທີ່ຂັບເຄື່ອນໄດ້ 4 ລໍ້ ໃຊ້ເວລາເຖິງ 2 ຊົ່ວໂມງກວ່າຈຶ່ງສາມາດຮອດບ້ານ ເຊິ່ງໃນການມອບເຄື່ອງຊ່ວຍເຫລືອໃນເທື່ອນີ້ ໄດ້ມອບຊຸດນັກຮຽນ 15 ຊຸດ, ເຄື່ອງນຸ່ງຫົ່ມຂອງພໍ່ແມ່ປະຊາຊົນ 45 ຊຸດ ແລະ ຄູ 2 ຊຸດ.
ເຖິງແນວໃດກໍດີ ເມື່ອເວົ້າເຖິງບ້ານ ນາລໍາ ບ້ານຊົນເຜົ່າໄຕດໍາ ແລະ ໄຕຂາວ , ມີພົນລະເມືອງທັງໝົດ 182 ຄົນ, ຍິງ 87 ຄົນ, ເດັກອາຍຸຕໍ່າກວ່າ 15 ປີ ມີ 57 ຄົນ, 39 ຄອບຄົວ ໃນນັ້ນມີ 7 ຄອບຄົວທຸກຍາກ, ອາຊີບຕົ້ນຕໍ ແມ່ນເຮັດໄຮ່ ເຮັດນາ. ເປັນບ້ານສຸດທ້າຍ ທີ່ສະມາຄົມສົ່ງເສີມເດັກ ນ້ອຍລາວຈາກປະເທດຍີ່ປຸ່ນ ໄດ້ມອບເຄື່ອງຊ່ວຍເຫລືອໃຫ້ ບ້ານດັ່ງກ່າວເປັນບ້ານວິລະຊົນ ຕັ້ງຢູ່ເຂດຫ່າງໄກສອກຫລີກ ທຸລະກັນດານ ແລະ ເປັນເຂດຫລໍ່ແຫລມ ຕິດກັບຊາຍແດນຫວຽດນາມ ຫ່າງຈາກເທດສະບານເມືອງ 130 ກິໂລແມັດ ມີເສັ້ນທາງເຂົ້າເຖິງພຽງລະດູດຽວ ສະນັ້ນ ການລົງມອບເຄື່ອງຊ່ວຍເຫລືອໃນເທື່ອນີ້ ຄະນະຜູ້ແທນຈາກສູນກາງ, ແຂວງ ແລະ ເມືອງ ເຊິ່ງຫ່າງຈາກເທດສະບານເມືອງໃໝ່ 170 ກິໂລແມັດ ແລະ ໃຊ້ເວລາ 6 ຊົ່ວໂມງ ໃນການເດີນທາງຜ່ານແຂວງດຽນບຽນຟູ ປະເທດຫວຽດນາມ 2 ຈຸດ ຄື: ດ່ານປາງຮົກ ແລະ ດ່ານຊີປາຟີນ ໄລຍະທາງແຕ່ດ່ານຊີປາຟີນ ຫາບ້ານນາລໍາ ພຽງແຕ່ 8 ກິໂລແມັດ ພັດເປັນເສັ້ນທາງທຸລະກັນດານ ມີຫ້ວຍ ຮ່ອງທີ່ເຕັມໄປດ້ວຍຫີນແຂງໃຫຍ່ 6 ຈຸດ ແລະ ຍ່າງຜ່ານທົ່ງນາ 1 ກິໂລແມັດໃຊ້ເວລາກວ່າ 1 ຊົ່ວໂມງ ຈຶ່ງຮອດບ້ານດັ່ງກ່າວ.
ໃນການມອບເຄື່ອງຊ່ວຍເຫລືອໃນເທື່ອນີ້ ບ້ານນາລໍາໄດ້ຮັບຊຸດນັກຮຽນ 104 ຊຸດ, ເຄື່ອງນຸ່ງຫົ່ມຂອງພໍ່ແມ່ປະຊາຊົນ 42 ຊຸດ ແລະ ຄູ 13 ຊຸດ ເຊິ່ງຖືວ່າເຄື່ອງຊ່ວຍເຫລືອໃນເທື່ອນີ້ຍັງບໍ່ທັນພຽງພໍຕໍ່ຈໍານວນນັກຮຽນເທື່ອ ແລະ ຄາດວ່າເທື່ອຕໍ່ໄປຈະໃຫ້ໄດ້ຄົບໝົດທຸກຄົນ. ສ່ວນມູນຄ່າໃນການຊ່ວຍເຫລືອສໍາລັບ 2 ບ້ານໃນເທື່ອນີ້ມີມູນຄ່າທັງໝົດ 30 ກວ່າລ້ານກີບ.
ທ່ານ ສົມຊາຍ ຄໍາທະມາ, ຜູ້ຕາງໜ້າສະມາຄົມສົ່ງເສີມເດັກນ້ອຍລາວຈາກປະເທດຍີ່ປຸ່ນ ໄດ້ກ່າວວ່າ: “ສໍາລັບການມອບເຄື່ອງຊ່ວຍເຫລືອໃນເທື່ອນີ້ ໂດຍສົມທົບກັບ ທລຍ ເປັນຄັ້ງປະຖົມມະເລີກ ແລະ ເປັນຄັ້ງທີ່ມີຄວາມໝາຍຄວາມສໍາຄັນ ໃນການລິເລີ່ມການສົ່ງເສີມອຸປະກອນການຮຽນ ແລະ ເຄື່ອງນຸ່ງ ຊຶ່ງ ຈະມີເທື່ອໜ້າຕໍ່ໄປໃນອະນາຄົດ ທັ້ງນີ້ ກໍເພື່ອເປັນສົ່ງເສີມ ແລະ ກະຕຸກຊຸກຍູ້ເດັກນ້ອຍລາວ ທີ່ອາໄສຢູ່ເຂດຊົນນະບົດຫ່າງໄກສອກຫລີກ ຕັ້ງໃຈສຶກສາຮໍ່າຮຽນຢ່າງຈິງຈັງ ແລະ ເປັນຮູບປະທໍາ ຢ່າງມີຜົນສໍາເລັດ ເພາະນ້ອງນ້ອຍນັກຮຽນເຫລົ່ານີ້ ແມ່ນກໍາລັງແຮງ ແລະ ອະນາຄົດຂອງຊາດ”
“ຂ້າພະເຈົ້າມີຄວາມພາກພູມໃຈຫລາຍທີ່ໄດ້ເປັນສ່ວນໜຶ່ງໃນການມອບເຄື່ອງຊ່ວຍເຫລືອໃຫ້ແກ່ນ້ອງນັກຮຽນ ແລະ ພໍ່ແມ່ປະຊາຊົນ ຢູ່ເຂດຫ່າງໄກສອກ ຫລີກທີ່ສຸດ ເຊິ່ງແມ່ນເປົ້າໝາຍການເຄື່ອນໄຫວໂຄງການ ທລຍ ທີ່ຈະໃຫ້ການຊ່ວຍເຫລືອທາງດ້ານພື້ນຖານໂຄງລ່າງໃຫ້ແກ່ຊຸມຊົນທີ່ທຸກຍາກເຂດນີ້. ການມອບເຄື່ອງຊ່ວຍເຫລືອໃນຄັ້ງນີ້ ແມ່ນເປັນກຳລັງແຮງສັງລວມໃນການປະກອບສ່ວນເຮັດໃຫ້ການສຶກສາ ແລະ ການແກ້ໄຂຄວາມທຸກຍາກໃນເຂດຊົນນະບົດຫ່າງໄກສອກຫລີກທຸລະການດານ ໄດ້ໄວຂຶ້ນ”. ທ່ານ ບຸນກວ້າງ ສຸວັນນະພັນ, ຜູ້ອໍານວຍການບໍລິຫານ ທລຍ ກ່າວວ່າ.
ນີ້ໄດ້ສະແດງໃຫ້ເຫັນວ່າ ເຖິງຄວາມເອົາໃຈໃສ່ ແລະ ຄວາມເປັນຫ່ວງໄປໄຍຂອງພັກ-ລັດ ກໍຄື ທລຍ ທີ່ຍາມໃດກໍຊ່ວຍຊອກຫາແຫລ່ງທຶນ ແລະ ດຶງດູດການຊ່ວຍເຫລືອຈາກພາຍໃນ ແລະ ສາກົນ ເພື່ອມາຊ່ວຍພໍ່ແມ່ປະຊາຊົນທີ່ທຸກຍາກ, ຜູ້ດ້ອຍໂອກາດ ຢູ່ເຂດຫ່າງໄກສອກຫລີກ ໃຫ້ຫລຸດພົ້ນອອກຈາກຄວາມທຸກຍາກ ເພື່ອບັນລຸຕາມເປົ້າໝາຍສະຫະສະຫວັດ ກໍຄືນໍາພາພໍ່ແມ່ປະຊາຊົນຫລຸດພົ້ນອອກຈາກຄວາມທຸກຍາກໃນປີ 2015 ແລະ ນໍາພາປະເທດຊາດຫລຸດພົ້ນອອກຈາກສະພາບດ້ອຍພັດທະນາໃນປີ 2020.
