ຄະນະວິຊາການຜູ້ໃຫ້ທຶນຈາກ ທະນາຄານໂລກ, ກົມການຄ້າ ແລະ ພົວພັນຕ່າງປະເທດຂອງປະເທດອົດສະ ຕຣາລີ ພົບປະ ຢ້ຽມຢາມການນໍາແຂວງ ແລະ ການນໍາເມືອງ

Posting Date:

10 Feb 2014

ໂດຍ: ແສງອາລຸນ ພິລາຈັນ

ເມືອງຫົວເມືອງເປັນເມືອງໜຶ່ງທີ່ຕັ້ງຢູ່ຫ່າງຈາກເທດສະບານແຂວງປະມານ 58 ກິໂລແມັດ, ເປັນເມືອງໜຶ່ງທີ່ນອນຢູ່ ສປປ ລາວ ເຊິ່ງຍັງຂາດເຂີນຫລາຍປັດໃຈເປັນຕົ້ນແມ່ນ ດ້ານພື້ນຖານໂຄງລ່າງເຊັ່ນ: ເສັ້ນທາງ, ໂຮງຮຽນ, ສຸກສາລາ, ນໍ້າລິນ, ຊົນລະປະທານ ແລະ ສິ່ງອໍານວຍຄວາມສະດວກອື່ນໆ ທີ່ຈໍາເປັນໃນການດໍາລົງຊີວິດຂອງປະຊາຊົນ.

ເມືອງຫົວເມືອງປະກອບມີ 10 ກຸ່ມບ້ານ, 76 ບ້ານ, 4,815 ຄົວເຮືອນ, ໃນນັ້ນ ມີ 2,417 ຄົວເຮືອນ, ມີພົນລະເມືອງທັງໝົດ 32,045 ຄົນ, ຍິງ 15,884 ຄົນ. ດ້ວຍເຫດນັ້ນ ພັກ-ລັດ ຈຶ່ງໄດ້ນໍາເອົາ ກອງທຶນຫລຸດຜ່ອນຄວາມທຸກຍາກ (ທລຍ) ເຂົ້າມາຈັດຕັ້ງປະຕິບັດຢູ່ເມືອງດັ່ງກ່າວນັບແຕ່ ຮອບວຽນທີ 2 (ສົກປີ 2004-05) ຈົນເຖິງປະຈຸບັນ ກໍຄື ທລຍ 2 ໃນໄລຍະກາງສະໄໝ.

ກ່ອນການລົງຕິດຕາມປະເມີນການຈັດຕັ້ງປະຕິບັດວຽກງານຂອງ ທລຍ 2 ໃນໄລຍະກາງສະໄໝ ຢູ່ເມືອງຫົວເມືອງ ແລະ ເມືອງວຽງທອງ ແຂວງຫົວພັນນັ້ນ ໃນວັນທີ 5 ກຸມພາ 2014 ທ່ານ ຈິດ ທະວີໃສ, ຫົວໜ້າຫ້ອງການແຜນການ ແລະ ພົວພັນຕ່າງປະເທດ, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ, ທ່ານ ບຸນກວ້າງ ສຸວັນນະພັນ, ຜູ້ອໍານວຍການບໍລິຫານ ທລຍ ໄດ້ໃຫ້ກຽດເປັນຜູ້ນໍາໜ້າພາທາງ ຄະນະວິຊາການຜູ້ໃຫ້ທຶນທີ່ມາຈາກ ທະນາຄານໂລກ, ກົມການຄ້າ ແລະ ພົວພັນຕ່າງປະເທດຂອງປະເທດອົດສະຕຣາລີ ໄດ້ເຂົ້າພົບປະ ຢ້ຽມຢາມການນໍາແຂວງ ແລະ ການນໍາເມືອງ ຢູ່ຫ້ອງການປົກຄອງເມືອງຫົວເມືອງ ໃນນັ້ນ ໄດ້ໃຫ້ກຽດຕ້ອນຮັບການພົບປະ ຢ້ຽມຢາມຂອງບັນດາຕາງໜ້າຜູ້ໃຫ້ທຶນໃນຄັ້ງນີ້ໂດຍ ທ່ານ ວັນໄຊ ແພງຊຸມມາ, ຄະນະປະຈໍາພັກແຂວງ, ຮອງເຈົ້າແຂວງຫົວພັນ, ທ່ານ ພັນທອງ ເພັດໄຊສົມພັນ, ກໍາມະການພັກແຂວງ, ຫົວໜ້າພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນແຂວງ, ທ່ານ ອໍາພອນ ພອນວິໄລ, ກໍາມະການພັກແຂວງ, ເລຂາພັກເມືອງ, ເຈົ້າເມືອງ ເມືອງຫົວເມືອງ, ບັນດາຜູ້ຕາງໜ້າຈາກພະແນກພົວພັນຕ່າງປະເທດແຂວງ, ຫ້ອງການປົກຄອງເມືອງ, ຫ້ອງການຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນເມືອງ, ຫ້ອງການແຜນການ ແລະ ການລົງທຶນເມືອງ, ຫ້ອງການສຶກສາທິການ ແລະ ກິລາເມືອງ, ຫ້ອງການສາທາລະນະສຸກເມືອງ, ຫ້ອງການໂຍທາທິການ ແລະ ຂົນສົ່ງເມືອງ, ຫ້ອງການກະສິກໍາ ແລະ ປ່າໄມ້ເມືອງ ທັ້ງນີ້ກໍເພື່ອເປັນການລາຍງານຈຸດປະສົງຂອງການລົງມາໃນເຮັດວຽກໃນຄັ້ງນີ້ ແລະ ພ້ອມທັງຮັບຟັງການລາຍງານຜົນຂອງການເຮັດວຽກຂອງ ທລຍ ກັບ ພາກລັດ ວ່າໄດ້ມີການປະສານງານ ແລະ ພົວພັນກັນຄືແນວໃດ ແລະ ໄດ້ຊ່ວຍສະໜັບສະໜູນແຜນການຈັດຕັ້ງປະຕິບັດຂອງແຂວງ ແລະ ເມືອງຄືແນວໃດ ເຊິ່ງການລົງພົບປະ ຢ້ຽມຢາມການນໍາແຂວງ ແລະ ເມືອງໃນຄັ້ງນີ້ ທ່ານ ວັນໄຊ ແພງຊຸມມາ, ຄະນະປະຈໍາພັກແຂວງ, ຮອງເຈົ້າແຂວງຫົວພັນ, ຕາໜ້າທາງການນໍາແຂວງ ກໍຄືການນໍາເມືອງ ໄດ້ຍ້ອງຍໍຊົມເຊີຍຜົນສໍາເລັດທີ່ທາງ ທລຍ ໄດ້ໃຫ້ການສະໜັບສະໜູນກິດຈະກໍາພື້ນຖານໂຄງລ່າງມາຕະຫລອດໄລຍະກາງສະໄໝຂອງ ທລຍ 2 ກໍຄືໄລຍະ 8 ປີຂອງ ທລຍ1 (2003-2011) ເຊິ່ງຖືວ່າ ທລຍ ໄດ້ຕັ້ງໜ້າສຸມກໍາລັງແຮງໃສ່ ເພື່ອເຮັດແນວໃດຈະສາມາດບັນລຸເປົ້າໝາຍສະຫັດສະວັດດ້ານການພັດທະນາໃນປີ 2020.

ອີກດ້ານໜຶ່ງກໍເພື່ອປະຕິບັດຕາມມະຕິຂອງກອງປະຊຸມໃຫຍ່ຄັ້ງທີ່ 9 ຂອງພັກ ກໍຄືບຸກທະລຸໃນການແກ້ໄຂຄວາມທຸກຍາກຂອງພໍ່ແມ່ປະຊາຊົນໃນທົ່ວປະເທດ ໃຫ້ປະກົດຜົນເປັນຈິງ.

ຮູບແບບຂອງການຈັດຕັ້ງປະຕິບັດວຽກຂອງ ທລຍ ໃນໄລຍະ 8 ປີຜ່ານມາ ກໍຄື ທລຍ 2 ໃນໄລຍະກາງສະໄໝນັ້ນ ຍາມໃດ ທລຍ ກໍພະຍາຍາມນໍາໃຊ້ຮູບການພັດທະນາທີ່ມາຈາກຄວາມຕ້ອງການຂອງປະຊາຊົນ ໂດຍການມີສ່ວນຮ່ວມຂອງປະຊາຊົນ ແລະ ເພື່ອຜົນປະໂຫຍດ ຂອງປະຊາຊົນ ໝາຍຄວາມວ່າ ເລີ່ມແຕ່ການວາງແຜນຢູ່ຂັ້ນບ້ານ, ຂັ້ນກຸ່ມ, ຂັ້ນເມືອງ, ການສໍາຫລວດອອກແບບ, ການຈັດຊື້-ຈັດຈ້າງ, ການຈັດຕັງປະຕິບັດໂຄງການ ລວມເຖິງ ການຄຸ້ມຄອງບໍລິຫານເງິນໂຄງການຍ່ອຍ, ການຄຸ້ມຄອງນໍາໃຊ້ ແລະ ບູລະນະສ້ອມແປງ ແມ່ນເຂົາເຈົ້າເປັນຜູ້ດໍາເນີນການເອງ.

ເຖິງແນວໃດກໍດີ ໃນໄລຍະຂອງການພົບປະ ຢ້ຽມຢາມໃນຄັ້ງນີ້ ບັນດາຕາງໜ້າຜູ້ໃຫ້ທຶນໄດ້ຍົກຫລາຍປະເດັນທີ່ສໍາຄັນຂຶ້ນເພື່ອປຶກສາຫາລື ເປັນຕົ້ນແມ່ນ ເຮັດແນວໃດເພື່ອປັບປຸງໂຄງການ ທລຍ ໃຫ້ມີຄວາມຍືນຍົງ? ການສົມທົບທຶນຈາກແຂວງ, ທລຍ ສ້າງພື້ນຖານໂຄງລ່າງໃຫ້ແລ້ວແມ່ນໃຜເປັນຜູ້ປົກປັກຮັກສາ, ກິດຈະກໍາຕ່າງໆທີ່ ທລຍ ໄດ້ສະໜັບສະໜູນນັ້ນ ໄດ້ແທດເໝາະກັບບຸລິມະສິດຂອງແຂວງ ແລະ ເມືອງຄືແນວໃດ? ທີ່ສໍາຄັນ ແມ່ນໄດ້ປຶກສາຫາລືກັນກ່ຽວກັບໂຄງສ້າງ ແລະ ຮູບແບບຂອງການຈັດຕັ້ງປະຕິບັດວຽກງານຂອງ ທລຍ ໄລຍະທີ 3.