ທລຍ/ຄປພ ເສີມສ້າງຄວາມເຂັ້ມແຂງໃຫ້ແກ່ຊຸມຊົນ
ໂດຍ: ສິນນະຄອນ ອິນທິລາດ
ໂຄງການປັບປຸງຊີວິດການເປັນຢູ່ ເພື່ອຄໍ້າປະກັນດ້ານໂພຊະນາການ ຫຼື ຄປພ ແມ່ນໂຄງການໜື່ງ ທີ່ຂື້ນກັບກອງທຶນຫຼຸດຜ່ອນຄວາມທຸກຍາກ(ທລຍ) ທີ່ໄດ້ຈັດຕັ້ງປະ ຕິບັດກ່ຽວກັບກິດຈະກໍາສ້າງລາຍຮັບ ແລະໄດ້ທົດລອງຢູ່ໃນ 4 ຕົວເມືອງ ໃນ 2 ແຂວງເປົ້າໝາຍຂອງ ທລຍ.
ເປົ້າໝາຍຂອງໂຄງການ ແມ່ນເພື່ອສ້າງຄວາມເຂັ້ມແຂງໃຫ້ແກ່ຊຸມຊົນ ເຮັດໃຫ້ເຂົາເຈົ້າໄດ້ມີລາຍຮັບເພີ່ມຂື້ນ ແລະເຊື່ອມສານກັບດ້ານໂພຊະນາການ ໂດຍ ສະເພາະແມ່ນ ເລັງໃສ່ ການເບິ່ງແຍງດູແລເດັກນ້ອຍທີ່ມີອາຍຸນັບແຕ່ມື້ເກີດຫາ 2 ປີ.ຊຸມຊົນມີລາຍຮັບກໍຕ້ອງຮູ້ຈັກບໍລິໂພກອາຫານທີ່ມີຄຸນຄ່າທັງດ້ານໂພຊະນາການ ເຮັດໃຫ້ສຸຂະພາບດີແຂງແຮງ ສະຫຼາດ ເປັນຄົນທີ່ມີຄຸນນະພາບ ມີອາຍຸຍືນ. ກິດຈະກໍາທີ່ທາງໂຄງການໄດ້ນຳໄປຊ່ວຍເຫຼືອປະຊາຊົນຄື : ດ້ານການປັບປຸງຊືວິດການ ເປັນຢູ່ແມ່ນ ສົ່ງເສິມການປູກ ການລ້ຽງ ໃຫ້ເປັນສິນຄ້າ ມີລາຍຮັບຢ່າງຕໍ່ເນື່ອງຍືນຍົງ ແລະ ດ້ານໂພຊະນາການ ແມ່ນສົ່ງເສີມໃຫ້ມີສູນໂພຊະນາການມີອາຫານປະ ຈຳວັນ ມີສວນຄົວ ເຊິ່ງມີຜືດພັນທັນຍາຫານທີ່ໃຫ້ຄຸນຄ່າທາງດ້ານໂພສະນາການ ວຽກງານການເຊື່ອມສານກັບສາທາລະນະສຸກ ໃນການໃຫ້ສຸກຂະສືກສາແກ່ພໍ່ແມ່ ປະຊາຊົນ ໂດຍເນັ້ນໃສ່ວຽກງານ 3 ສະອາດ.
ຜ່ານການຈັດຕັ້ງປະຕິບັດໂຄງການ ນັບແຕ່ປີ 2012 ເປັນຕົ້ນມາ ກໍຖືວ່າເປັນເວລາເກືອບ 2 ປີປາຍແລ້ວ ກໍໄດ້ເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນໃນບ້ານ ເປົ້າໝາຍຂອງໂຄງການດີຂື້ນ ມີຄວາມເຂັ້ມແຂງສາມາດສ້າງລາຍຮັບແລະ ຮູ້ຈັກບໍລິໂພກອາຫານທີ່ມີຄຸນະພາບ ມີຄຸນຄ່າທາງດ້ານໂພຊະນາການ ເຊິ່ງໃນແຕ່ລະປີ ທາງໂຄງການໄດ້ມີການຈັດກອງປະຊຸມ ເພື່ອທົບທວນການຈັດຕັ້ງປະຕິບັດປະຈຳປີຂື້ນແນໃສ່ໃຫ້ພະນັກງານໂຄງການແຕ່ລະເມືອງ ພະນັກງານປະຈຳຢູ່ກຸ່ມບ້ານ ໄດ້ມີ ໂອກາດປືກສາຫາລື ແລກປ່ຽນບົດຮຽນນຳກັນ ໄດ້ສ້າງຄວາມເຂັ້ມແຂງໃຫ້ເຂົາເຈົ້າ ໃນການຈັດຕັ້ງປະຕິບັດວຽກງານ ໄດ້ທັງປະລິມານ ແລະ ຄຸນນະພາບ.
ສະນັ້ນ ໃນວັນທີ 4-7 ສິງຫາ 2014 ຄປພ ຈຶ່ງ ໄດ້ຈັດກອງປະຊຸມດັ່ງກ່າວຂື້ນ ທີ່ເມືອງວຽງໄຊ ແຂວງຫັວພັນ ໂດຍການເປັນປະທານຂອງ ທ່ານ ພັນທອງ ເພັງໄຊ ສົມບູນ ຄະນະປະຈໍາພັກແຂວງ, ຫົວໜ້າຫ້ອງການພັດທະນາຊົນນະບົດ ແລະ ລົບລ້າງຄວາມທຸກຍາກ ແຂວງ ໂດຍການເຂົ້າຮ່ວມຂອງ ທ່ານຮອງ ເຈົ້າເມືອງ ຂອງ 2 ເມືອງຄື: ເມືອງຮ້ຽມ ແລະ ເມືອງຊ້ອນ, ພະນັກງານຫ້ອງການອ້ອມຂ້າງ ຈາກຫ້ອງການກະສິກຳ, ຫ້ອງການສາທາລະນະສຸກຂອງ 2 ເມືອງດັ່ງກ່າວ, ພະນັກ ງານໂຄງການ ຄປພ ຈາກສູນກາງ ຄື: ທ່ານ ນ ພູຄຳ ສີປະເສີດ, ຜູ້ປະສານງານໂຄງການຂັ້ນສູນກາງ ພ້ອມດ້ວຍ ພະນັກງານວິຊາການ ຄປພ ທີ່ຮັບຜິດຊອບວຽກງານ ປັບປຸງຊີວິດການເປັນຢູ່ ແລະ ໂພຊະນາການ, ພະນັກງານຈາກ ພະແນກພັດທະນາຊຸມຊົນ, ພະນັກງານ ຈາກໂຄງການ ຄປພ ທັງ 4ເມືອງ ຈາກ ແຂວງ ຫົວພັນ 2 ເມືອງ ແລະ ແຂວງສະຫວັນນະເຂດ 2 ເມືອງ ຄື: ເມືອງເຊໂປນ ແລະ ເມືອງນອງ ພ້ອມນັ້ນຍັງມີຜູ້ປະສານງານ ທລຍ ທັງ 2 ແຂວງ ພິເສດກອງປະຊຸມໃນຄັ້ງນີ້ ໄດ້ຮັບ ການຕິດຕາມຂອງ ທ່ານ ດຣ ຊິງ ຊ່ຽວຊານ ຂອງໂຄງການ ຄປພ. ລວມຜູ້ເຂົ້າຮ່ວມທັງໝົດໃນກອງປະຊຸມຄັ້ງນີ້ 60 ຄົນ ,ຍິງ 20 ຄົນ.
ເຖິງແນວໃດກໍດີ ກ່ອນຈະໄດ້ຈັດກອງປະຊຸມດັ່ງກ່າວ ເພື່ອເຮັດໃຫ້ພະນັກງານ ຄປພ ໄດ້ມີການແລກປ່ຽນບົດຮຽນເຊິ່ງກັນແລະ ກັນ ລະຫວ່າງເມືອງຕໍ່ເມືອງ ບ້ານຕໍ່ບ້ານນັ້ນ ຈຶ່ງໄດ້ຈັດໃຫ້ມີທັດສະນະສຶກສາໄປຢ້ຽມຢາມ ກິດຈະກຳທີ່ໄດ້ຮັບຜົນສຳເລັດ ຢູ່ເມືອງຮ້ຽມຄື: ກິດຈະກໍາ ດ້ານການສ້າງລາຍຮັບແມ່ນການລ້ຽງໄກ່, ການຕໍ່າ ຫູກ, ການລ້ຽງປາ ແລະ ຢ້ຽມຢາມການຈັດຕັ້ງປະຕິບັດກິດຈະກໍາໃນສູນໂພຊະນາການ ຂອງບ້ານໃນເມືອງດັ່ງກ່າວ. ເຊິ່ງເຫັນໄດ້ວ່າການເຮັດກິດຈະກໍາທັດສະນະສຶກ ສາລັກສະນະນີ້ ມີຜົນປະໂຫຍດຫລາຍ ແລະ ສາມາດເຮັດໃຫ້ເຂົາເຈົ້ານໍາເອົາບົດຮຽນຈາກບ້ານ ຈາກເມືອງ ທີ່ເຂົາເຈົ້າໄປທັດສະນະນັ້ນ ໄປຜັນຂະຫຍາຍ ແລະ ພັດທະນາເຂົ້າສູ່ວຽກງານຕົວຈິງຂອງເຂົາເຈົ້າໄດ້ຢ່າງມີປະສິດຕິພາບ ແລະ ປະສິດຕິຜົນ.
