ກອງປະຊຸມທົບທວນຄຶນກ່ຽວກັບວຽກງານ ຕິດຕາມປະເມີນຜົນ
ທລຍ ປະຈຳປີ 2014
ຫັດທະຈັນ ພິມພັນທະວົງ
ກອງປະຊຸມທົບທວນຄືນ ແລະ ສ້າງຄວາມເຂັ້ມແຂງ ໃຫ້ວິຊາການທີ່ຮັບຜິດຊອບວຽກງານຕິດຕາມ-ປະເມີນຜົນຂອງ ກອງທຶນຫລຸດຜ່ອນຄວາມທຸກຍາກ (ທລຍ) ປະຈໍາສົກປີ 2013-2014. ກອງ ປະຊຸມຄັ້ງນີ້ໄດ້ຈັດຂື້ນທີ່ໂຮງແຮມແມ່ຂອງ, ນະຄອນຫລວງວຽງຈັນ ໃນລະຫວ່າງວັນທີ 22-26 ກັນຍາ 2014, ໂດຍການເຂົ້າຮ່ວມຂອງພະນັກງານທີ່ຮັບຜິດຊອບວຽກງານດັ່ງກ່າວ ທັງໝົດ 21 ຄົນ, ຍິງ 5 ຄົນ (24%). ໃນນັ້ນມາຈາກສູນກາງ ຈໍານວນ 6 ຄົນ, ຍິງ 1 ຄົນ, ມາຈາກແຂວງຈຳນວນ 10 ຄົນ, ຍິງ 2 ຄົນ ແລະ ມາຈາກຫ້າເມືອງທົດລອງຂອງໂຄງ ການຂັບເຂື່ອນໂດຍຊຸມຊົນ (CDD) ຈໍາ ນວນ 5 ຄົນ, ຍິງ 3 ຄົນ.
ເພື່ອຮັບປະກັນປະສິດຕິພາບ ແລະ ຜົນສໍາເລັດຕ່າງໆ ກອງປະຊຸມຄັ້ງນີ້ໄດ້ຖືເປັນກຽດກ່າວເປີດກອງປະຊຸມ ແລະ ໃຫ້ຄຳໂອວາດໂດຍ ທ່ານບຸນກວ້າງ ສຸວັນນະພັນ ຜູ້ອໍານວຍການກອງທຶນ ຫລຸດຜ່ອນຄວາມທຸກຍາກ ແລະ ທ່ານ ຈູລຽນ ຊ່ຽວຊານທີ່ປຶກສາອະວຸໂສຂອງໂຄງການ ທລຍ ໄລຍະ 2. ທ່ານທັງສອງໄດ້ຊີ້ແຈງ ແລະ ຍົກໃຫ້ເຫັນພາ ລະບົດບາດຂອງວຽກ ງານຕິດຕາມ-ປະເມີນຜົນ ທີ່ປຽບເໝືອນຈຸດໃຈກາງ ແລະ ເປັນວຽກທີ່ຈະຕັດສິນກ່ຽວໄລຍະສືບຕໍ່ໂຄງການຂອງ ທລຍ ໄລຍະ 3.
ຈຸດປະສົງຂອງກອງປະຊຸມໃນຄັ້ງນີ້ແມ່ນ:
1. ເພື່ອທົບທວນພາລະບົດບາດແລະສ້າງຄວາມເຂັ້ມແຂງໃຫ້ແກ່ພະນັກງານວິຊາການຕິດຕາມ-ປະເມີນຜົນ.
2. ພ້ອມນັ້ນກໍ່ຍັງເປັນການຝຶກອົບຮົມໃຫ້ພະນັກງານຕິດຕາມ-ປະເມີນຜົນຄົນໃໝ່ທີພວມມາສັງກັດແລະເຮັດວຽກຮ່ວມກັບທລຍໂດຍການຝຶກອົບຮົມຄັ້ງນີ້ແມ່ນອີງໃສ່ປະສົບການແລະບົດຮຽນຂອງແຕ່ລະແຂວງເພື່ອສຶກສາເບີ່ງຂໍ້ບົດຝ່ອງແລະນຳສະເໜີວິທີແກ້ໄຂ.
3. ວິທີການນຳໃຊ້ຖານຂໍ້ມູນ, ການວິເຄາະຄວາມຖືກຕ້ອງຂອງຂໍ້ມູນແລະການນຳໃຊ້ຕົວຊີ້ວັດຜົນກະທົບຂອງທລຍ 2 ທີທາງຜູ້ໃຫ້ທືນກຳລັງໃຫ້ຄວາມສົນໃຈແລະເຈາະຈີ້ມ.
4. ແນະນຳກ່ຽວກັບການສຶກສາການນຳໃຊ້ໂຄງການທີ່ໄດ້ເຮັດສຳເລັດແລ້ວໃນຮອບວຽນ 9 ແລະ 10 ລວມທັງບາງໂຄງການໃນຮອບວຽນ 11 ເພື່ອເປັນຄຳຕອບທີ່ຊັດເຈນຕໍ່ຜູ້ໃຫ້ທືນວ່າໂຄງການທີ່ທລຍໄດ້ສະໜັບສະໜຸນແມ່ນສາມາດນຳໃຊ້ໄດ້ຫລືເປ່ເພແລ້ວມີວິທີໃນການບຳລຸງຮັກສາແນວໃດ.
ຍ້ອນເຫັນໄດ້ບົດບາດຄວາມສຳຄັນຂອງວຽກງານຕິດຕາມ-ປະເມີນຜົນ ຂອງຜູ້ໃຫ້ທຶນ ກອງປະຊຸມຄັ້ງນີ້ກໍ່ຍັງໃຫ້ກຽດໂດຍ ທ່ານ Satoshi Ishihara ຈາກທະນາຄານໂລກ ຊ່ຽວຊານຜູ້ຊີ້ນຳວຽກງານ ທລຍ ທ່ານໄດ້ກ່າວໂດຍຫຍໍ້ກ່ຽວກັບພາລະບົດບາດຂອງພະນັກງານ ຕິດຕາມ-ປະເມີນ ພ້ອມທັງໄດ້ນຳສະເໜີບາງເຕັກນິກ ທີ່ຈະເຮັດໃຫ້ວຽກງານດັ່ງກ່າວປະສົບຜົນສຳເລັດ ເຊິ່ງມີບາງຕອນ ທ່ານໄດ້ເນັ້ນໜັກວ່າ: ວຽກງານຕິດຕາມ-ປະເມີນຜົນແມ່ນວຽກງານທີ່ພະນັກງານ ທລຍ ທຸກຄົນຕ້ອງໄດ້ເອົາໃຈໃສ່ ແລະ ກໍ່ແມ່ນຄວາມຮັບຜິດຊອບຂອງທຸກພາກສ່ວນ ໂດຍສະເພາະການ ສະໜອງຂໍ້ມູນທີ່ມີຄວາມຖືກຕ້ອງ ແລະ ທັນກັບເວລາ.
ພ້ອມດຽວກັນນັ້ນ ກອງປະຊຸມຄັ້ງນີ້ກໍ່ຍັງໄດ້ຮັບກຽດເຂົ້າຮ່ວມຂອງ ບັນດາຫົວໜ້າພະແນກ ແລະ ໜ່ວຍງານຂັ້ນສູນກາງທີ່ກ່ຽວຂ້ອງ ເຊັ່ນ: ຫົວໜ້າພະແນກວິສາວະກຳ, ຫົວໜ້າພະແນກພັດທະ ນາຊຸມຊົນ, ຫົວໜ້າໜ່ວຍງານຈັດຊື້-ຈັດຈ້າງ, ຕາງໜ້າຫົວໜ້າພະແນກບໍລິຫານ-ການເງິນ, ຫົວໜ້າໜ່ວຍງານຈັດຕັ້ງ ແລະ ພະນັກງານຝຶກງານຈາກອົງການຊ່ວຍເຫລືອຂອງປະເທດສະວິດເຊີແລນ (SDC)ກໍ່ໄດ້ເຂົ້າຮ່ວມ. ພິເສດ ການຝຶກອົບຮົມໃນຄັ້ງນີ້ ໄດ້ໃຫ້ກຽດເຂົ້າຮ່ວມຂອງ ທ່ານ Gamini ຊ່ຽວຊານດ້ານ ການພັດທະນາທີ່ຂັບເຄື່ອນໂດຍຊຸມຊົນ ຈາກທະນາຄານໂລກ ທ່ານໄດ້ນຳສະເໜີກ່ຽວກັບຂັ້ນຕອນ ແລະ ເຕັກນິກຂອງການຕິດຕາມປະເມີນຜົນທີ່ມີປະສິດຕິພາບ ຖືວ່າເປັນບາດກ້າວສຳຄັນທີ່ເປັນການທົບທວນພາລະບົດບາດຂອງຜູ້ຮັບຜິດຊອບວຽກງານຕິດຕາມ-ປະເມີນຜົນ ທີ່ເຂົ້າຮ່ວມກອງປະຊຸມຄັ້ງນີ້.
ສະຫລຸບແລ້ວ ຕະຫລອດໄລຍະ 5 ວັນ ນັກສຳມະນາກອນສຳລັບກອງປະຊຸມຄັ້ງນີ້ ແມ່ນມີຄວາມເຂົ້າໃຈຕໍ່ພາລະບົດບາດຂອງຕົນ ແລະ ວຽກງານຕິດຕາມ-ປະເມີນຜົນ ໄດ້ເປັນຢ່າງດີ ແລະ ພ້ອມທີ່ຈະນໍາເອົາຄວາມຮູ້ຄວາມສາມາດທີ່ໄດ້ຈາກກອງປະຊຸມໃນຄັ້ງນີ້ໄປຜັນຂະຫຍາຍໃນໜ້າທີ່ວຽກງານຂອງຕົນໃຫ້ເກີດດອກອອກຜົນ.
ທ່ານ ນາງ ມີປາພາພອນ ພິມມະສອນ, ຜູ້ຮັບຜິດຊອບວຽກງານຕິດຕາມ-ປະເມີນຜົນ ທລຍ ແຂວງຫລວງພະບາງ ໄດ້ກ່າວວ່າ: “ຂ້າພະເຈົ້າຮູ້ສຶກພາພູມໃຈຫລາຍທີ່ໄດ້ມີໂອກາດມາເຂົ້າຮ່ວມກອງປະຊຸມທົບທວນຄຶນກ່ຽວກັບວຽກງານ ຕິດຕາມປະເມີນຜົນ ທລຍ ປະຈຳປີ 2014 ເພາະຂ້າພະເຈົ້າໄດ້ຮຽນຮູ້ຫລາຍສິ່ງຫລາຍຢ່າງທີ່ບໍ່ທັນຮູ້ແຈ້ງ ແລະ ເລີກເຊິ່ງກ່ຽວກັບວຽກທີ່ຕົນເອງຮັບຜິດຊອບ ເກີດມີຄວາມເຂົ້າໃຈຢ່າງເລີກເຊິ່ງ ແລະ ຄວາມຮູ້ທີ່ຂ້າພະເຈົ້າ ໄດ້ຈາກກອງປະຊຸມໃນຄັ້ງນີ້ ຈະສາມາດປັບປຸງວຽກງານຂອງຕົນຮັບຜິດຊອບ ມີປະສິດຕິພາບ ແລະ ປະສິດຕິຜົນຫລາຍຂຶ້ນກວ່າເກົ່າ.
