ທລຍ ແລະ ຜູ້ໃຫ້ທຶນເອົາໃຈໃສ່ ແລະ ເສີມສ້າງຄວາມເຂັ້ມແຂງວຽກຕິດຕາມ-ປະເມີນຜົນ
ໃຫ້ແກ່ພະນັກງານ ທລຍ ຜູ້ຮັບຜິດຊອບວຽກດັ່ງກ່າວ
ໂດຍ: ຫັດທະຈັນ ພິມພັນທະວົງ
ເນື່ອງຈາກວ່າວຽກງານຕິດຕາມ-ປະເມີນຜົນ ເປັນວຽກທີ່ຜູ້ໃຫ້ທຶນໃຫ້ຄວາມສົນໃຈ ແລະ ຈະເປັນເງື່ອນໄຂທີ່ນຳໃຊ້ເຂົ້າໃນການພິຈາລະນາ ການສືບຕໍ່ສຳລັບ ທລຍ ໄລຍະທີ 3. ບົດຮຽນທີ່ໄດ້ຮັບໄລຍະຜ່ານມາແມ່ນບັນດາຂໍ້ມູນຕ່າງໆ ທີ່ມີໃນລະບົບຖານຂໍ້ມູນແມ່ນຖືວ່າຍັງບໍ່ທັນພຽງພໍ ແລະ ຄຸນນະພາບຂອງຂໍ້ມູນດັ່ງກ່າວຍັງຕ້ອງໄດ້ຮັບການປັບປຸງ ໃຫ້ສອດຄ່ອງກັບຕົວຊີ້ວັດຜົນໄດ້ຮັບຂອງ ທລຍ ໄລຍະທີ 2 ສະນັ້ນຜູ້ໃຫ້ທຶນກໍ່ຕັ້ງຄຳຖາມວ່າສາຍເຫດດັ່ງກ່າວແມ່ນເກີດຈາກເຫດຜົນໃດແທ້, ອາດເກີດຈາກຄວາມເຂົ້າໃຈຂອງຜູ້ລົງເກັບກຳຂໍ້ມູນ ການນຳໃຊ້ແບບຟອມ ຫລື ຜູ້ປ້ອນຂໍ້ມູນເຂົ້າໃນລະບົບຖານ ຂໍ້ມູນ.
ສະນັ້ນ, ທະນາຄານໂລກໄດ້ສົ່ງຊ່ຽວຊານສະເພາະດ້ານ (ທ່ານ George Collett) ມາຊ່ວຍວຽກງານຕິດຕາມ-ປະເມີນຜົນ ໃນລະຫວ່າງວັນທີ 3-22 ຕຸລາ 2014 ໂດຍການປະສານສົມທົບກັບບັນດາ ພະແນກຕ່າງໆ ໃນຂັ້ນສູນກາງ, ແຂວງ ແລະ ເມືອງ.
ເພື່ອເປັນການປັບປຸງວຽກງານດັ່ງກ່າວຢູ່ຂັ້ນສູນກາງ ກໍຄືຂັ້ນທ້ອງຖິ່ນໃຫ້ດີຂຶ້ນກວ່າເກົ່ານັ້ນ ໃນລະຫວ່າງວັນທີ 12-19 ຕຸລາ 2014ພະແນກຕິດຕາມ-ປະເມີນຜົນ ທລຍ ສູນກາງ ຮ່ວມກັບຊ່ຽວຊານຕິດ ຕາມ-ປະເມີນຜົນຈາກທະນາຄານໂລກ (ທ່ານ George Collett)ໄປຕິດຕາມ ແລະ ໃຫ້ຄໍາແນນະນໍາອ້າຍເອື້ອຍນ້ອງພະນັກງານຮັບຜິດຊອບວຽກຕິດຕາມ-ປະເມີນຜົນ ຢູ່ແຂວງສະຫວັນນະເຂດ, ເຊກອງ ແລະ ອັດຕະປື
ຈຸດປະສົງຂອງການລົງເຮັດວຽກຄັ້ງນີ້ແມ່ນ ເພື່ອປະເມີນຄວາມເຂົ້າໃຈຂອງພະນັກງານຂັ້ນເມືອງກ່ຽວການນຳໃຊ້ແບບຟອມຕ່າງໆຂອງ ທລຍ ແຕ່ຂັ້ນວາງແຜນ, ການສຳຫລວດອອກແບບ, ການຈັດຕັ້ງ ປະຕິບັດ, ການປະມູນ, ແລະອື່ນໆ. ລວມທັງການເຮັດວຽກຂອງພະນັກງານຂັ້ນແຂວງ ເປັນຕົ້ນແມ່ນການສຶກສາວ່າພາກສ່ວນໃດກ່ຽວຂ້ອງກັບການເກັບລວບລວມຂໍ້ມູນ ແລະ ປ້ອນຂໍ້ມູນເຂົ້າໃນລະບົບ ຖານຂໍ້ມູນ.
ຜົນຂອງການປະເມີນຄັ້ງນີ້ໄດ້ຊີ້ໃຫ້ເຫັນວ່າ:
ພະນັກງານທຸກຄົນຂັ້ນແຂວງ ແລະ ເມືອງແມ່ນໄດ້ເອົາໃຈໃສ່ປະຕິບັດຕາມພາລະບົດບາດຂອງຕົນ ໂດຍສະເພາະພະນັກງານທີ່ໄດ້ເຮັດວຽກຫລາຍປີນຳ ທລຍ ແມ່ນມີຄວາມເຂົ້າໃຈກັບໜ້າວຽກຕ່າງໆ ສໍາລັບພະນັກງານທີ່ສັງ ກັດໃໝ່ຄວນໃຫ້ມີການຈັດຝຶກອົບຮົມ ເພື່ອທຳຄວາມເຂົ້າໃຈກ່ຽວກັບພາລະບົດບາດຂອງຕົນ ເປັນຕົ້ນພະນັກງານທີ່ມີສ໋ວນກ່ຽວຂ້ອງກັບການລົງເກັບກຳຂໍ້ມູນ ແລະການນຳໃຊ້ແບບຟອມ ຕ່າງໆ.
ການນຳໃຊ້ແບບບຟອມຍັງບໍ່ເປັນເອກະພາບກັນ ລະຫວ່າງຟອມໃໝ່ ແລະ ຟອມເກົ່າ ເປັນຕົ້ນບົດສະເໜີໂຄງການຍ່ອຍ ລວມທັງບົດປະເມີນຜົນກະທົບທາງສັງຄົມ ແລະ ສິ່ງແວດລ້ອມ, ບັນດາຂໍ້ມູນທີ່ ສຳຄັນທີ່ກ່ຽວຂອງກັບບັນດາຕົວຊີ້ວັດຜົນໄດ້ຮັບຂອງໂຄງການແມ່ນຍັງບໍ່ໄດ້ຕຶ່ມເຂົ້າຟອມ ແລະ ພະນັກງານຍັງມີຄວາມສັບສົນກ່ຽວກັບການ ນໍາໃຊ້ແບບຟອມ ເພາະເຂົາເຈົ້າຍັງ ບໍ່ທັນເຂົ້າໃຈລະອຽດວ່າບັນດາຂໍ໊ ມູນດັ່ງກ່າວມີຄວາມສຳຄັນແນວໃດແທ້ ເປັນຕົ້ນຜູ້ໄດ້ຮັບຜົນປະໂຫຍດທາງກົງ, ທາງອ້ອມ, ໄດ້ຮັບຜົນປະໂຫຍດກ່ອນ ແລະ ຫລັງການຈັດຕັ້ງປະຕິບັດ.
ການລົງຕິດຕາມການບຳລຸງຮັກສາ ແລະ ການນຳໃຊ້ໂຄງການ ໄດ້ຊີ້ໃຫ້ເຫັນວ່າຊຸມຊົນແມ່ນມີຄວາມເພິ່ງພໍໃຈກ່ຽວກັບບັນດາໂຄງການ ທີ່ ທລຍ ໄດ້ໃຫ້ການຊ່ວຍເຫລືອ ເພາະສາມາດອຳນວຍຄວາມສະ ດວກມະຫາສານຕໍ່ຊີິວິດການເປັນຢູ່ຂອງເຂົາເຈົ້າ. ຕົວຢ່າງ: ການລົງຢ້ຽມຢາມການນຳໃຊ້ນໍ້າສ້າງບາດານຢູ່ບ້ານເພຍແກ້ວ, ກຸ່ມບ້ານນໍ້າປາ, ເມືອງຊານໄຊ ແຂວງ ອັດຕະປື ທີ່ໄດ້ສຳພາດແມ່ຍິງພາຍໃນບ້ານຜູ້ໄດຮັບ ຜົນປະໂຫຍດໂດຍກົງ ເຂົາເຈົ້າໄດ້ຕອບວ່າມີຄວາມເພິ່ງພໍໃຈຫລາຍ ເພາະເຮັດໃຫ້ເຂົາເຈົ້າສາມາດປະຢັດເວລາໃນການໄປເອົານໍ້າ ເພື່ອມານຳໃຊ້ ກ່ອນມີການສະໜອງນໍ້າດັ່ງກ່າວ ເຂົາເຈົ້າຕ້ອງໄປຫາບເອົານໍ້າຢູ່ຫ້ວຍ ທີ່ໄກຈາກບ້ານ 2-3 ກມ ແລະ ນໍ້າທີ່ໄດ້ແມ່ນບໍ່ສະອາດ ແຕ່ພາຍຫລັງທີ່ ທລຍ ໄດ້ໃຫ້ການຊ່ວຍເຫລືອເຮັດໃຫ້ຊີວິດເຂົາເຈົ້າດີຂື້ນຫລາຍທຽບໃສ່ແຕ່ກ່ອນ.
