ທະນະຄານໂລກ ແລະ ລັດຖະບານຂອງປະເທດອົດສະຕາລີ ໃຫ້ທຶນສະໜັບສະໜູນ ທລຍ ຕື່ມອີກ 14 ລ້ານໂດລາສະຫະລັດ.
ໂດຍ: ທລຍ
ກອງທຶນຫລຸດຜ່ອນຄວາມທຸກຍາກ (ທລຍ) ແມ່ນອົງການຈັດຕັ້ງໜື່ງ ຂອງລັດ ຖະບານ ຖືກສ້າງຕັ້ງຂຶ້ນ ໂດຍ ມີຈຸດປະສົງ ເພື່ອປະກອບສ່ວນ ເຂົ້າໃນການແກ້ໄຂຄວາມທຸກຍາກຢູ່ບັນດາເມືອງເປົ້າໝາຍບຸລິມະສິດຂອງລັດຖະບານ. ເຊິ່ງເປົ້າ ໝາຍ ແມ່ນເພື່ອເຮັດໃຫ້ພໍ່ແມ່ປະຊາຊົນ ໄດ້ເຂົ້າເຖິງການບໍລິການ ແລະ ນຳໃຊ້ສິ່ງອໍານວຍຄວາມສະດວກດ້ານ ພື້ນຖານໂຄງລ່າງ ຢ່າງມີປະສິດທິຜົນ. ໂດຍຖືເອົາຮູບແບບການພັດທະນາທີ່ຂັບເຄື່ອນໂດຍຊຸມຊົນ ເຊິ່ງໄດ້ສ້າງໃຫ້ຊຸມຊົນມີຄວາມເຂັ້ມ ແຂງ ແລະ ມີຄວາມເປັນເຈົ້າໃນການພັດທະນາບ້ານຂອງຕົນເອງຫລາຍຂຶ້ນ ນັບແຕ່ການວິເຄາະສະຖານະພາບບ້ານ, ກຳນົດບຸລິມະສິດຄວາມຕ້ອງການຂອງບ້ານ ເພື່ອແກ້ໄຂບັນຫາທີ່ຫຍຸ້ງຍາກ ຈົນເຖິງການກໍ່ສ້າງໂຄງການຍ່ອຍ ແລະ ປຸກລະດົມຂະບວນການບູລະນະສ້ອມແປງ ລວມໄປເຖິງການຄຸ້ມຄອງ ແລະ ບໍລິຫານເງິນຂອງໂຄງການຍ່ອຍແມ່ນຊຸມຊົນເປັນຜູ້ຄຸ້ມຄອງເອງ ເຊິ່ງເວົ້າໄດ້ວ່າເປັນຮູບແບບສ້າງຄວາມເຂັ້ມແຂງໃຫ້ແກ່ພໍ່ແມ່ປະຊາຊົນ ແລະ ອຳນາດການປົກຄອງຂັ້ນທ້ອງຖີ່ນຢ່າງ ເປັນລະບົບຄົບຊຸດ.
ຍ້ອນເຫດຜົນດັ່ງກ່າວນັ້ນ ເພື່ອສຶບຕໍ່ການຈັດຕັ້ງປະຕິບັດໂຄງການ ທລຍ2 ຢູ່ 10 ແຂວງ, 44 ເມືອງ, 278 ກຸ່ມບ້ານ, 1951 ບ້ານ ໃນລະຫວ່າງ ເດືອນທັນວາ 2015 ຫາ ເດືອນທັນວາ 2016 ແລະ ທັງເປັນການກະກຽມ ທລຍ 3 (2016-2020). ໃນວັນທີ 17 ສິງຫາ 2015 ຜ່ານມາ ລັດຖະບານລາວ ແລະ ທະນາຄານໂລກ ໄດ້ຮ່ວມລົງນາມໃນຂໍ້ຕົກລົງທຶນເພີ່ມໃຫ້ແກ່ກອງທຶນຫລຸດຜ່ອນຄວາມທຸກຍາກທີ່ມີມູນຄ່າ 11,6 ລ້ານ ໂດລາ ສະຫະລັດ ແລະ ລັດຖະບານຂອງປະເທດອົດສະຕາລີ ຕື່ມອີກ 2,4 ລ້ານໂດລາສະຫະລັດ ຢູ່ທີ່ກະຊວງການເງິນ ໂດຍຕາງໜ້າລົງນາມຂອງລັດຖະບານລາວແມ່ນ ທ່ານ ນາງ ທິບພະກອນ ຈັນທະວົງສາ, ລັດຖະມົນຕີຊ່ວຍວ່າການກະຊວງການເງິນ ແລະ ຕາງໜ້າລົງນາມຂອງທະນາຄານໂລກ ທ່ານ ອູຣິກ ຊັກຄາວ, ຫົວໜ້າຫ້ອງການທະນາຄານໂລກ ປະຈໍາອາຊີຕາເວັນອອກສ່ຽງໃຕ້ ແລະ ເປັນກຽດເຂົ້າຮ່ວມເປັນສັກຂີພະຍານຂອງທ່ານ ບຸນເຮືອງ ດວງພະຈັນ, ລັດຖະມົນຕີປະຈໍາຫ້ອງວ່າການລັດຖະບານ, ຫົວໜ້າຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນ ສູນກາງ, ຕາງໜ້າບັນດາກະຊວງທີ່ກ່ຽວຂ້ອງ ແລະ ຜູ້ໃຫ້ທຶນ.
ທ່ານ ນາງ ທິບພະກອນ ຈັນທະວົງສາ, ລັດຖະມົນຕີຊ່ວຍວ່າການ ກະຊວງການເງິນ ໄດ້ກ່າວວ່າ: ການໃຫ້ທຶນເພີ່ມຈາກທະນາຄານໂລກ ລັດຖະບານຂອງປະເທດອົດສະຕາລີ ໃຫ້ແກ່ ກອງທຶນຫລຸດຜ່ອນຄວາມທຸກຍາກ ໃນເທື່ອນີ້ ແມ່ນເພື່ອສຶບຕໍ່ວຽກງານຫລຸດຜ່ອນຄວາມທຸກຍາກ ໃນ ສປປ ລາວ ເຊິ່ງເປັນອົງປະກອບທີ່ສໍາຄັນໃນແຜນພັດທະນາເສດຖະກິດ-ສັງຄົມແຫ່ງຊາດ ໂດຍແນໃສປັບປຸງມາດຕະຖານຊີວິດການເປັນຢູ່ຂອງປະຊາຊົນລາວ.
ທ່ານ ອູຣິກ ຊັກຄາວ, ຫົວໜ້າຫຫ້ອງການທະນາຄານໂລກ ປະຈໍາອາຊີຕາເວັນອອກສ່ຽງໃຕ້ ກ່າວວ່າ: ໃນໄລຍະ 15 ປີຜ່ານມາ, ຄວາມທຸກຍາກໃນ ສປປ ລາວ ໄດ້ຫລຸດລົງຢ່າງຕໍ່ເນື່ອງ ເຊິ່ງຫລຸດລົງຢູ່ໃນລະດັບທີ່ຕໍ່າກວ່າ 1 ສ່ວນ 4 ຂອງຈໍານວນປະຊາກອນທັງໝົດໃນປີ 2013. ແຕ່ຂະນະດຽວກັນ, ສປປ ລາວ ກໍໄດ້ປະສົບກັບສິ່ງທ້າທາຍໃນການພັດທະນາເຊັ່ນກັນ ເຊິ່ງພວກເຮົາມີຄວາມຍີນດີທີ່ຈະສືບຕໍ່ໃຫ້ການສະໜັບສະໜູນໃຫ້ແກ່ແຜນງານຂອງລັດຖະບານກ່ຽວກັບການຫລຸດຜ່ອນຄວາມທຸກຍາກໃຫ້ຫລາຍກວ່າເກົ່າ.
