ບ້ານນ້ຳຫງາດ ເມືອງໝອກ ໄດ້ໂຮງຮຽນອະນຸບານຫລັງໃໝ່
ໂດຍ: ຮົ້ວຈັ້ງ
ຍາມໃດພັກ-ລັດ ກໍໄດ້ຖືເອົາການສຶກສາຮໍ່າຮຽນ ເປັນວຽກງານປາຍແຫລມໃນການກໍ່ສ້າງຊັບພະຍາກອນມະນຸດ ເພື່ອໃຫ້ມີຄວາມຮູ້ຄວາມສາມາດໃນການກໍ່ສ້າງພັດທະນາປະເທດຊາດບ້ານເມືອງໃຫ້ຈະເລີນຮຸ່ງເຮືອງສີວິໄລ. ເມື່ອເຫັນຄວາມສໍາຄັນຄືແນວນັ້ນ ກອງທຶນຫລຸດຜ່ອນຄວາມທຸກຍາກ(ທລຍ) ຊຶ່ງເປັນໂຄງການໜຶ່ງຂອງລັດຖະບານ ເພື່ອສະໜັບສະໜູນນະໂຍບາຍ ແລະ ເປົ້າໝາຍໃນການແກ້ໄຂຄວາມທຸກຍາກ. ສະນັ້ນ. ໃນປີ 2017 ທລຍ ຈຶ່ງໄດ້ໃຫ້ການຊ່ວຍເຫລືອໃນການກໍ່ສ້າງໂຮງຮຽນອະນຸບານບ້ານນ້ຳຫງາດ ເມືອງໝອກ ແຂວງຊຽງຂວາງ ເຊິ່ງການກໍ່ສ້າງໂຮງຮຽນຫລັງດັ່ງກ່າວໄດ້ເລີ່ມລົງມືແຕ່ທ້າຍເດືອນ ພຶດສະພາ ແລະ ສໍາເລັດໃນຕົ້ນເດືອນ ສິງຫາ 2017. ໂຮງຮຽນຫລັງດັ່ງກ່າວເປັນອາຄານຊັ້ນດຽວ ມີຂະໜາດ 14x8 ແມັດ, ມີ2ຫ້ອງ ແລະ2ຫ້ອງນ້ຳ ແລະ ມີມູນຄ່າໃນການກໍ່ສ້າງທັງໝົດ 297 ລ້ານກວ່າກີບ ໃນນັ້ນ ຊຸມຊົນປະກອບສ່ວນທາງດ້ານແຮງງານ ແລະ ວັດຖຸທ້ອງຖິ່ນ ຕົກເປັນມູນຄ່າກວ່າ 22 ລ້ານກີບ.
ດັ່ງນັ້ນ, ເພື່ອມອບໃຫ້ຊຸມຊົນເປັນຜູ້ຄຸ້ມຄອງນໍາໃຊ້ໂຮງຮຽນຫລັງດ່ງກ່າວ ໃນວັນທີ 12 ກັນຍາ 2017 ຜ່ານມາ ຈຶ່ງໄດ້ມີພິທີມອບໂຮງຮຽນອະນຸບ້ານບ້ານນ້ຳຫງາດຂຶ້ນຢ່າງເປັນທາງການໂດຍເປັນກຽດເຂົ້າຮ່ວມຂອງທ່ານດີມົວຮອງເລຂາພັກເມືອງຮອງເຈົ້າເມືອງ ເມືອງໝອກ, ທ່ານຄຳພອນສີສົມບຸນຫົວໜ້າຫ້ອງການທລຍແຂວງຊຽງຂວາງ, ທີມງານທລຍ ເມືອງ, ຕາງໜ້າ ບໍລິສັດຮັບເໝົາກໍ່ສ້າງ, ອຳນວຍການໂຮງຮຽນ, ຄູອາຈານ, ອຳນາດການປົກຄອງບ້ານ ແລະພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ.
ໃນຕອນທ້າຍທ່ານດີມົວ ຮອງເລຂາພັກເມືອງຮອງເຈົ້າເມືອງ ເມືອງໝອກ ໄດ້ສະແດງຄວາມຂອບໃຈ ມາຍັງຫ້ອງການທລຍທີ່ໄດ້ສະໜັບສະໜູນງົບປະມານໃນການກໍ່ສ້າງໂຮງຮຽນໃຫ້ແກ່ເມືອງໝອກເປັນຈຳນວນຫຼວງຫຼາຍ, ທ່ານໄດ້ສະແດງຄວາມຍ້ອງຍໍຊົມຕໍ່ຜົນສຳເລັດໂຄງການການກໍ່ສ້າງໂຮງຮຽນຫຼັງດັ່ງກ່າວ ແລະຮຽກຮ້ອງໃຫ້ຄະນະພັກ, ອຳນາດການປົກຄອງບ້ານ, ຄູອາຈານ ແລະພໍ່ແມ່ປະຊາຊົນແຕ່ລະຄົນເປັນເຈົ້າການໃນການຄຸ້ມຄອງ ແລະ ປົກປັກຮັກສາໃຫ້ໄດ້ຊົມໃຊ້ຍາວນານ ເພື່ອເປັນການຕອບສະໜອງຕາມຄວາມຮຽກຮ້ອງຕ້ອງການຂອງບ້ານ ແລະເຮັດໃຫ້ເດັກໃນເກນອາຍຸ 3 – 5 ປີ ໄດ້ເຂົ້າຮຽນຢ່າງທົ່ວເຖິງ.
