ຜູ້ໃຫ້ທຶນເພິ່ງພໍໃຈກັບການຈັດຕັ້ງປະຕິບັດໂຄງການຍ່ອຍຂອງ ທລຍ
ໂດຍ: ແສງອາລຸນ ພິລາຈັນ
ໃນລະຫວ່າງວັນທີ 9-11 ກໍລະກົດ 2016 ຜ່ານມາ, ບັນດາຜູ້ໃຫ້ທຶນ ກອງທຶນຫລຸດຜ່ອນຄວາມທຸກຍາກ (ທລຍ) ປະກອບດ້ວຍ: ທະນາຄານໂລກແລະ ລັດຖະບານອົດສະຕາລີ ໄດ້ລົງ ກວດກາການຈັດຕັ້ງປະຕິບັດວຽກງານ ທລຍ ໄລຍະທີ 2 (2011-2016) ຢູ່ແຂວງຫລວງພະບາງ ແລະ ກະກຽມ ທລຍ 3 (2017-2019).
ສໍາລັບການລົງ ກວດກາການຈັດຕັ້ງປະຕິບັດນີ້ ບັນດາຜູ້ໃຫ້ທຶນໄດ້ໄປຢ້ຽມຢາມ ໂຄງການກໍ່ສ້າງເສັ້ນທາງ ບ້ານດ່ວນໃຕ້, ກຸ່ມນໍ້າດ່ວນ, ເມືອງນໍ້າບາກ, ໂຄງການກໍ່ສ້າງຕະຫລາດກະສິກໍາຊຸມຊົນບ້ານນະຄອນ, ກຸ່ມບ້ານນະຄອນ, ເມືອງນໍ້າບາກ, ໂຄງການສ້ອມແປງທາງ ບ້ານປ່າໄຜ່, ກຸ່ມສົບເຮືອງ, ເມືອງວຽງຄໍາ ເຊິ່ງເຫັນວ່າບັນດາຜູ້ໃຫ້ທຶນມີຄວາມເພິ່ງພໍໃຈຫລາຍຕໍ່ກັບການຈັດຕັ້ງປະຕິບັດໂຄງການຍ່ອຍຂອງ ທລຍ ເພາະໂຄງການດັ່ງກ່າວແມ່ນໄດ້ຈັດຕັ້ງປະຕິບັດຕາມຂັ້ນຕອນ, ຫລັກການ ແລະ ລະບຽບຂອງ ທລຍ ກໍຄືວາງແຜນແຕ່ລຸ່ມຂຶ້ນເທິງ ທຸກໆຂັ້ນຕອນແມ່ນຊຸມຊົນເປັນເຈົ້າການໃນການຈັດຕັ້ງປະຕິບັດ ເປັນໂຄງການທີ່ຜູ້ທຸກຍາກແທ້ໆ ໄດ້ຮັບຜົນປະໂຫຍດ. ພາຍຫລັງໂຄງການຍ່ອຍຕ່າງໆທີ່ກໍ່ສ້າງສໍາເລັດ ແລະ ມອບໃຫ້ຊຸມຊົນເປັນຜູ້ປົກປັກຮັກສາ ແລະ ຄຸ້ມຄອງນໍາໃຊ້ນັ້ນ ເຂົາເຈົ້າໄດ້ສ້າງຕັ້ງລະບຽບການນໍາໃຊ້ ແລະ ສ້າງຕັ້ງກອງທຶນບູລະນະສ້ອມແປງບ້ານທຸກໆໂຄງການຍ່ອຍ.
ທ່ານ ຊາໂຕຊິ ອິຊິຮາຣາ, ຊ່ຽວຊານອາວຸໂສດ້ານພັດທະນາສັງຄົມ, ຜູ້ຊີ້ນໍາວຽກງານ ທລຍ ຈາກທະນາໂລກ ກ່າວວ່າ: “ຂ້າພະເຈົ້າເຫັນວ່າການຈັດຕັ້ງປະຕິບັດໂຄງການຍ່ອຍຂອງ ທລຍ ໄດ້ມີລະບົບລະບຽບດີ, ມີປະສິດຕິພາບ ແລະ ປະສິດຕິຜົນ ທຸກໆໂຄງການຍ່ອຍແມ່ນຊົນເຜົ່າ ແລະ ຜູ້ທຸກຍາກທີ່ສຸດໄດ້ຮັບຜົນປະໂຫຍດໂດຍກົງ ເຊິ່ງເຫັນວ່າເປັນການລົງທຶນທີ່ເໝາະສົມ ແລະ ຖືກເປົ້າໝາຍທີ່ສຸດ“.
“ແຕ່ເຖິງຢ່າງໃດກໍດີ ສໍາລັບທິດທາງໃນຕໍ່ໜ້າກໍຄື ທລຍ 3 ຂ້າພະເຈົ້າຄິດວ່າຢາກໃຫ້ ທລຍ ເອົາໃຈໃສ່ຕື່ມໃນດ້ານການຕິດຕາມກວດກາ ຄວາມຍືນຍົງຂອງໂຄງການຍ່ອຍຕ່າງໆ ເພື່ອເຮັດແນວໃດໃຫ້ໂຄງການຍ່ອຍຕ່າງໆຖືກນໍາໃຊ້ຢ່າງກຸ້ມຄ່າ ແລະ ມີຄວາມຍືນຍົງ“.
