ສຳເລັດກອງປະຊຸມປະສານງານການວາງແຜນຂັ້ນເມືອງ
3 ເມືອງຂອງແຂວງ ເຊກອງ
ໂດຍ : ພັດທະນາຊຸມຊົນຖິ່ນເຊກອງ
ເພື່ອເປັນການກະກຽມ ແລະ ຈັດຕັ້ງປະຕິບັດນຳເດີນກອງປະຊຸມປະສານງານການວາງແຜນຂັ້ນເມືອງ ໃຫ້ສຳເລັດໃນຕົ້ນເດືອນຕຸລາ ປີ 2014 ຕາມກໍານົດເວລາ ການຈັດຕັ້ງປະຕິບັດວຽກງານ ກອງທຶນຫຼຸດຜ່ອນຄວາມທຸກຍາກ ແຂວງເຊກອງ ວາງອອກນັ້ນ ແຕ່ວັນທີ 25 ເດືອນ ກັນຍາ ຫາ ວັນທີ 06 ເດືອນ ຕຸລາ 2014ທລຍ ແຂວງເຊກອງໄດ້ຈັດກອງປະຊຸມປະສານງານການວາງແຜນຂັ້ນເມືອງຂຶ້ນຢູ່ 3 ເມືອງເປົ້າໝາຍ ໂດຍການເປັນປະທານຂອງຮອງເຈົ້າເມືອງຂອງແຕ່ລະເມືອງ ແລະ ການເຂົ້າຮ່ວມຂອງຜູ້ຕາງໜ້າ ພະແນກ ແລະ ຫ້ອງການທີ່ກ່ຽວຂ້ອງເຊັ່ນ: ພະແນກ ແລະ ຫ້ອງການສຶກສາ ແລະ ກິລາ, ພະແນກ ແລະ ຫ້ອງການສາທາລະນະສຸກ,ພະ ແນກ ແລະ ຫ້ອງການກະສິກຳ ແລະ ປ່າໄມ້, ພະແນກ ແລະ ຫ້ອງການໂຍທາທິການ ແລະ ຂົນສົ່ງ ແລະ ຫ້ອງການພັດທະນາຊົນນະບົດ ແລະ ລຶບລ້າງຄວາມທຸກຍາກ ຂັ້ນແຂວງ ແລະ ຂັ້ນເມືອງ ພ້ອມດວ້ຍອຳນາດການປົກເມີືອງ ແລະ ທລຍ ເມືອງ,ແຂວງ ຕະຫລອດຮອດຕົວແທນບ້ານທີ່ໄດ້ຮັບໂຄງການໃນຮອບວຽນທີ 12 ເຂົ້າຮ່ວມ ກອງປະຊຸມຢູ່ແຕ່ລະເມືອງຄື: ເມືອງກະລຶມ, ດາກຈຶງ,ລະມາມ ຢ່າງພ້ອມພຽງກັນ.
ທີ່ກອງປະຊຸມໄດ້ມີການສະຫລຸບ ແລະ ລາຍງານການຈັດຕັ້ງປະຕິບັດໂຄງການຍ່ອຍໃນຮອບວຽນຜ່ານມາຢູ່ 3 ຕົວເມືອງໃຫ້ຮູ້ວ່າ ມາຮອດປະຈຸບັນການກໍ່ສ້າງ ໂຄງການຂອງຮອບວຽນທີ 11 ແມ່ນໄດ້ຮັບທຶນທັງໝົດທົ່ວແຂວງເຊກອງ ມີ 20 ໂຄງການ.ໃນນັ້ນ ແມ່ນມີທຶນຈາກໂຄງການກອງທຶນຫຼຸດຜອ່ນຄວາມທຸກຍາກ ( ທລຍ ) ແມ່ນ ຫ້າກວ່າຕື້ກີບ (5,455,140,463 ) ທຶນຊຸມຊົນປະກອບສ່ວນເປັນແຮງງານ ແລະ ວັດຖຸທ້ອງຖິ່ນແມ່ນ ສາມຮ້ອຍກວ່າລ້ານກີບ (356,076,920) ລວມທັງໝົດປະມານ ຫ້າກວ່າຕື້ກີບ 5,721,217,380 ແລະ ການກໍ່ສ້າງໂຄງການທົ່ວແຂວງ ມາຮອດປະຈຸບັນແມ່ນຄວາມຄືບໜ້າໄດ້ 80 % ,ໃນຈໍານວນ 20 ໂຄງການນັ້ນຢູ່ເມືອງ ກະລຶມ ມີ 7 ໂຄງການ,ເມີືອງ ລະມາມ ມີ 6 ໂຄງການ ກຸ່ມບ້ານລະ 1 ໂຄງການ,ສໍາລັບເມືອງ ດາກຈຶງ ມີ 7 ໂຄງການ .
ຈຸດປະສົງຫລັກຂອງກອງປະຊຸມດັ່ງກ່າວແມ່ນເພື່ອຮັບຮອງເອົາແຜນການກໍ່ສ້າງໂຄງການຍ່ອຍ ທີ່ຊຸມຊົນໄດ້ຕັດສິນໃຈເອົາຢູ່ຂັ້ນບ້ານ ແລະ ຂັ້ນກຸ່ມ ເພື່ອມາເຍື່ອງໃສ່ແຜນພັດທະນາເສດຖະກິດສັງຄົມຂອງເມືອງ ແລະ ໂຄງການພັດທະນາອື່ນໆ ເພື່ອຫລີກລ້ຽງການລົງທຶນທີ່ຊໍ້າຊ້ອນກັນ ແລະ ຖ້າມີແຜນພັດທະນາອັນດຽວກັນ ກໍຊອກຫາວິທີລົງທຶນຮ່ວມກັນ ທັງນີ້ ກໍເພື່ອເພີ້ມຂອດການປະສານງານລະຫວ່າງ ທລຍ ແລະ ຂະແໜງການທີ່ກ່ຽວຂ້ອງໃຫ້ມີຄວາມກົມກຽວກັນ ໝາຍວ່າໄປໃນລວງດຽວກັນ.
ຜ່ານການດໍາເນີນກອງປະຊຸມ ຢູ່ 3 ເມືອງເຫັນວ່າ ໄດ້ມີການປະສານສົມທົບ ແລະ ປຶກສາຫາລືກັນເປັນຢ່າງດີ ແລະ ໄດ້ຕົກລົງເຫັນດີໃຫ້ມີການດຳເນີນຈັດຕັ້ງປະ ຕິບັດໂຄງການຮອບວຽນທີ12 ມີທັງໝົດ 21 ໂຄງການໃນນັ້ນຢູ່ ເມືອງ ດາກຈຶງ ມີ 8 ໂຄງການ, ກະລຶມ 7 ໂຄງການ ແລະ ລະມາມມີ 6 ໂຄງການ ໃນປີນີ້ແມ່ນ ກຸ່ມບ້ານລະ 1 ໂຄງການ,ໃນຈຳນວນໂຄງການທັງໝົດແມ່ນກວາມເອົາໃນຂະແໜງ ສາທາລະນະສຸກ 10 ໂຄງການ,ສຶກສາທິການ ແລະ ກິລາ 10 ໂຄງການ ແລະ ກະສິກໍາ ແລະ ປ່າໄມ້ 1 ໂຄງການ. ຖ້າຫາກວ່າໂຄງການດັ່ງກ່າວໄດ້ຈັດຕັ້ງປະຕິບັດສໍາເລັດ ແລະ ມອບໃຫ້ຊຸມຊົນເປັນຜູ້ຄຸ້ມຄອງນໍາໃຊ້ແລ້ວນັ້ນ ກໍຈະສາມາດຫລຸດ ຜ່ອນຄວາມທຸກຍາກໃຫ້ແກ່ຊຸມຊົນຢູ່ 3 ເມືອງເປົ້າໝາຍຫລາຍພໍສົມຄວນ.
