ໂດຍ: ພູທອນ ພົມມະພາວັນ ທລຍ ນ້ຳບາກ
ກອງທຶນຫລຸດຜ່ອນຄວາມທຸກຍາກ ຫຼື ທລຍ ແມ່ນໂຄງການລັດຖະບານ ທີ່ມີຄວາມຮັບຜິດຊອບຕໍ່ກັບພາລະກິດ ດ້ານພັດທະນາຊຸມຊົນ ແລະ ຫລຸດຜອ່ນຄວາມທຸກຍາກໃຫ້ແກ່ພໍແມ່ປະຊາຊົນໃນເຂດຊົນນະບົດ ທີ່ກວາມເອົາ 80% ຂອງພົນລະເມືອງລາວ.
ການຈັດຕັ້ງປະຕິບັດໂຄງການຂອງ ທລຍ ແມ່ນນໍາໃຊ້ຮູບແບບ ແລະ ວິທີການພັດທະນາທີ່ຂັບເຄື່ອນໂດຍຊຸມຊົນແບບເຕັມຮູບແບບ, ເນື່ອງຈາກ ຮູບແບບດັ່ງກ່າວ ແມ່ນຮູບແບບ ທີ່ສ້າງໃຫ້ຊຸມຊົນມີຄວາມເຂັ້ມແຂງ ແລະ ມີຄວາມເປັນເຈ້ົ້າຕົນເອງໃນການພັດທະນາບ້ານຂອງເຂົາເຈົ້າດ້ວຍຕົວຂອງເຂົາເຈົ້າເອງ, ເປັນຕົ້ນແມ່ນ ພໍແມ່ປະຊາຊົນຂັ້ນບ້ານ ອໍານາດການປົກຄອງຂັ້ນກຸ່ມບ້ານ ໄດ້ເຂົ້າຮ່ວມຂະບວນການຈັດຕັ້ງປະຕິບັດ ຊຶ່ງເລີ້ມຈາກການເກັບກໍາຂໍ້ມູນ ແລະ ວິເຄາະບັນຫາຂອງບ້ານ, ກຳນົດບຸລິມາສິດຄວາມຕ້ອງການຂອງບ້ານ ເພື່ອແກ້ໄຂບັນຫາທີ່ຫຍຸ້ງຍາກ ກີດຂວາງການພັດທະນາບ້ານຂອງເຂົາເຈົ້າດ້ວຍຕົວເອງ ໄປຈົນເຖິງການກໍ່ສ້າງໂຄງການຍ່ອຍ ແລະ ສ້າງຂະບວນການບູລະນະສ້ອມແປງ ສິ່ງທີ່ເຂົາເຈົ້າໄດ້ຮັບໃນແຕ່ລະປີ ທີ່ ທລຍ ໃຫ້ການຊ່ວຍເຫຼືອ ເພາະມັນແມ່ນຮູບແບບວິທີການທີເຮັດວຽກຮ່ວມກັບຊຸມຊົນຢ່າງເປັນລະບົບຄົບຊຸດ, ທັງເປັນການສ້າງຄວາມເຂັ້ມແຂງໃຫ້ທັງອໍານາດການປົກຄອງ ແລະ ຊຸມຊົນ, ສະນັ້ນຍຸດທະສາດນີ້ ແມ່ນອອກແບບແທດເໝາະກັບສະພາບການພັດທະນາຊົນນະບົດຂອງລາວ ແລະ ສອດຄ່ອງກັບນະໂຍບາຍຂອງລັດຖະບານທີ່ວ່າ “ທຸກສິ່ງທຸກຢ່າງແມ່ນມາຈາກຄວາມຕ້ອງການຂອງປະຊາຊົນ ຈັດຕັ້ງປະຕິບັດໂດຍຊຸມຊົນ ແລະ ເພື່ອຜົນປະໂຫຍດຂອງຊຸມຊົນຜູ້ທຸກຍາກ ແລະ ປະຊາຊົນບັນດາເຜົ່າ”. ໂດຍສະເພາະແມ່ນ ການພັດທະນາພື້ນຖານໂຄງລ່າງຂະໜາດນ້ອຍ ຢູ່ໃນ 4 ກຸ່ມບ້ານ ຂອງເມືອງນ້ຳບາກຄື: ກຸ່ມບ້ານນະຄອນ, ກຸ່ມບ້ານນ້ຳດວ່ນ, ກຸ່ມບ້ານນໍ້າສັດ ແລະ ກຸ່ມບ້ານຊົ່ງຈ່າ.
ໃນຮອບວຽນທີ 11 ສົກປີ 2013-2014. ທລຍ ໄດ້ໃຫ້ການສະໜັບສະໜູນ ການພັດທະນາພື້ນຖານໂຄງລ່າງຂະ ໜາດນ້ອຍ ຢູ່ໃນ 4 ກຸ່ມບ້ານ ຂອງເມືອງນ້ຳບາກຄື: ກຸ່ມບ້ານນະຄອນ, ກຸ່ມບ້ານນ້ຳດ່ວນ, ກຸ່ມບ້ານນໍ້າສັດ ແລະ ກຸ່ມບ້ານຊົ່ງຈ່າ. ດ່ັງນັ້ນ ໃນເດືອນ ກຸມພາ 2015 ທີ່ຜ່ານມານີ້ ບ້ານນະຄອນ, ເມືອງນໍ້າບາກ, ແຂວງຫຼວງພະບາງ ກໍ່ໄດ້ຈັດພິທີມອບຮັບ ແລະ ເປີດນໍາໃຊ້ຕະຫຼາດຊຸມຊົນຂື້ນ. ໃນພິທີດັ່ງກ່າວ ເປັນກຽດເຂົ້າຮວ່ມຂອງທ່ານ ບຸນສົງ ລັດສະໜີ ຄະນະປະຈຳພັກເມືອງ, ປະທານກວດກາ ພັກ-ລັດເມືອງ, ທ່ານ ພູທອນ ພົມມະພາວັນ ຜູ້ຮັບຜິດຊອບວຽກງານກອງທືນຫລຸດຜ່ອນຄວາມທຸກຍາກຂັ້ນເມືອງ, ໃນນັ້ນມີແຂກຖືກເຊີນຈາກບັນດາຫ້ອງການຕ່າງໆຂັ້ນເມືອງ, ນາຍບ້ານອອ້ມຂ້າງ ພ້ອມດວ້ຍພໍ່ແມ່ປະຊາຊົນເຂົ້າຮວ່ມຢ່າງຫຼວງຫຼາຍ. ໃນພິທີດ່ັງກ່າວ ຕອນໜຶ່ງຂອງບົດລາຍງານ ທ່ານ ສົມຄິດ ອິນທະນາຈັກ ນາຍບ້ານ-ບ້ານນະຄອນ ກຸ່ມນະຄອນ ເມືອງນໍ້າບາກແຂວງຫລວງພະບາງໄດ້ ກ່າວວ່າ: ພວກເຮົາໄດ້ນໍາໃຊ້ທຶນເຂົ້າໃນການກໍ່ສ້າງຕະຫຼາດຊຸມຊົນຫລັງນີ້ ມີຈໍານວນທັງໝົດ 200 ລ້ານກວ່າກີບ ໃນນີ້ ທຶນທີ່ໄດ້ຮັບຈາກ ທລຍ ແມ່ນ 142 ລ້ານກວ່າກີບ ແລະ ຊາວບ້ານປະກອບສ່ວນ 63 ລ້ານກວ່າກີບ, ຊຶ່ງພວກເຮົາໄດ້ເລີ່ມລົງມືກໍ່ສ້າງມາແຕ່ວັນທີ 28 ເມສາ ຫາວັນທີ 28 ກໍລະກົດ 2014 ຈຶ່ງສຳເລັດການກໍ່ສ້າງ, ພວກເຮົາໄດ້ໃຊ້ເວລາໃນການກໍ່ສ້າງພຽງແຕ່ 90 ວັນ. ຕະຫຼາດດັ່ງກ່າວເປັນອາຄານຊັ້ນດຽວ ມີຄວາມຍາວ 15 ແມັດ, ກວ້າງ 10 ແມັດ, ພື້ນປູດວ້ຍເບ່ຕົ່ງ, ມຸງດວ້ຍສັງກະສີ. ໂຄງການຍ່ອຍນີ້ແມ່ນມາຈາກຄວາມຕ້ອງການຂອງປະຊານເຮົາເອງ ຈຸດປະສົງຂອງການ ກໍ່ສ້າງແມ່ນເພື່ອສ້າງສິ່ງອຳນວຍຄວາມສະດວກ ໃຫ້ແກ່ພໍ່ແມ່ປະຊາຊົນພາຍໃນກຸ່ມບ້ານ ກ່ຽວກັບການຈໍລະຈອນສິນຄ້າ, ແລກປຽ່ນຊື້ຂາຍ ໃຫ້ໄດ້ທຸກລະດູການ ແລະ ມາຮອດມື້ນີ້ພວກເຮົາກໍໍ່ແມ່ນໄດ້ເຮັດສໍາເລັດຕາມຄວາມຕ້ອງການຂອງຊາວບ້ານພວກເຮົາແລ້ວ ຂ້າພະເຈົ້າ ຕາງໜ້າໃຫ້ຊາວບ້ານຂໍສະແດງຄວາມຊົມຊົມເຊີຍ ພໍແມ່ປະຊາຊົນ ທີ່ໄດ້ເອົາໃຈໃສ່ ຮ່ວມມືສາມັກຄີກັນປະກອບສ່ວນ ຈົນເຮັດໃຫ້ຕະລາດຂອງພວກເຮົາຖຶກກໍ່ສ້າງສໍາເລັດສົມບູນ ແລະ ຂໍຂອບອົກຂອບໃຈນໍາຂັ້ນເທິງ ແລະ ທຸກພາກສ່ວນທີ່ໃຫ້ການຊ່ວຍເຫຼືອກຸ່ມບ້ານຂອງພວກເຮົາ ໃນຂັ້ນຕໍ່ໄປຕະຫລາດຫລັງນີ້ແມ່ນ ເປັນຂອງພວກເຮົາ ພວກເຮົາຈະໄດ້ພ້ອມກັນປົກປັກຮັກສາ ແລະ ຊົມໃຊ້ໃຫ້ເກີດປະໂຫຽດສູງສຸດແກ່ພໍໍ່ແມ່ປະຊາຊົນໃນກຸ່ມບ້ານຂອງພວກເຮົາສືບຕໍ່ໄປ. ຕໍ່ຈາກນັ້ນ ຕາງໜ້າໃຫ້ກອງທືນຫລຸດຜ່ອນຄວາມທຸກຍາກ ກໍ່ໄດ້ມອບໂຄງການກໍ່ສ້າງໃຫ້ທາງອຳນາດການປົກຄອງເມືອງເພື່ອຊົມໃຊ້, ປົກປັກຮັກສາ ແລະ ອຳນາດການປົກຄອງເມືອງກໍ່ໄດ້ມອບຕໍ່ໃຫ້ທາງອຳນາດການປົກຄອງບ້ານ ເປັນຜູ້ຊົມໃຊ້, ປົກປັກຮັກສາ ບູລະນະສ້ອມແປງເວລາເປເພຊຸດຊົມ ເພື່ອຮັບປະກັນໃຫ້ຕະຫລາດຫລັງນີ້ຖຶກນຳໃຊ້ໃຫ້ໄດ້ຍາວນານ ແລະ ກຸ້ມຄ່າແກ່ການລົງທຶນຂອງພັກ ແລະ ລັດຖະບານ, ຕອບສະໜອງ ,ແກ້ໄຂໄດ້ບັນຫາການຂາດຕະຫລາດໃນເຂດຊົນນະບົດຕໍ່ກັບການສ້າງລາຍຮັບໃຫ້ກັບພໍ່ແມ່ປະຊາຊົນ.
