ກອງປະຊຸມແນະນໍາໂຄງການທຶນເພີ່ມຕື່ມ ທລຍ 3 (2020-2024) ໃຫ້ແກ່ພະນັກງານ ທລຍ ແຂວງອຸດົມໄຊ ແລະ ຊຽງຂວາງ
ໂດຍອີງຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 524/ຫສນຍ ລົງວັນທີ 1 ພຶດສະພາ 2020 ວ່າດ້ວຍການສືບຕໍ່ປະຕິບັດບັນດາມາດຕະການໃນການປ້ອງກັນ, ສະກັດກັ້ນ ແລະ ແກ້ໄຂ ການລະບາດຂອງພະຍາດ COVID 19ໃນໄລຍະແຕ່ ວັນທີ 04-17 ພຶດສະພາ 2020, ອີງຕາມຄູ່ມືຈັດຕັ້ງປະຕິບັດ ແລະ ອີງໃສ່ແຜນວຽກປະຈໍາໄຕມາດ 2/2020 ຂອງໂຄງການທຶນເພີ່ມຕື່ມ ທລຍ ໄລຍະທີ 3 ແລະ ທັງເປັນການປະຢັດຄ່າໃຊ້ຈ່າຍໃນການເດີນທາງມາປະຊຸມຮ່ວມກັນ ສະນັ້ນ,ໃນລະຫວ່າງວັນທີ 12-13 ພຶດສະພາ 2020 ກອງທຶນຫຼຸດຜ່ອນຄວາມທຸກຍາກ (ທລຍ), ກະຊວງກະສິກໍາ ແລະ ປ່າໄມ້ ຈຶ່ງໄດ້ຈັດກອງປະຊຸມແນະນໍາໂຄງການນີ້ ໃຫ້ແກ່ພະນັກງານ ທລຍ ຂັ້ນແຂວງ ແລະ ເມືອງເປົ້າໝາຍ ຢູ່ແຂວງອຸດົມໄຊ ແລະ ຊຽງຂວາງ ໃນຮູບແບບເວັ້ນໄລຍະຫ່າງ ນໍາໃຊ້ລະບົບການປະຊຸມແບບອອນລາຍ ໂດຍການເປັນປະທານຂອງທ່ານ ປະສອນໄຊ ອິນສີຊຽງໃໝ່, ຮອງຜູ້ອໍານວຍການ ກອງທຶນຫຼຸດຜ່ອນຄວາມທຸກຍາກ ແລະ ການເຂົ້າຮ່ວມຂອງຄະນະອໍານວຍການ, ພະນັກງານ ທລຍ ສູນກາງເປັນຜູ້ບັນຍາຍ 9 ທ່ານ ລວມທັງໝົດ ຈໍານວນ 28 ທ່ານ, ຍິງ 8 ທ່ານ.
ທ່ານ ປະສອນໄຊ ອິນສີຊຽງໃໝ່ໄດ້ກ່າວວ່າ: “ຈຸດປະສົງຂອງກອງປະຊຸມ ແມ່ນເພື່ອສ້າງຄວາມເຂົ້າໃຈເປັນເອກະພາບໃຫ້ແກ່ພະນັກງານ ທລຍ ຂັ້ນແຂວງ ແລະ ເມືອງໝົດທຸກຄົນ ກໍາໄດ້ໃນດ້ານນະໂຍບາຍ, ລະບຽບຫຼັກການ, ກິດຈະກໍາ ແລະ ວິທີຈັດຕັ້ງປະຕິບັດຂອງແຕ່ລະພາກສ່ວນ ແລະ ວິທີການຈັດຕັ້ງປະຕິບັດກ່ຽວກັບໂຄງການທຶນເພີ່ມຕື່ມ ທລຍ 3 ກ່ອນການຈັດຕັ້ງປະຕິບັດໂຄງການຢູ່ຂັ້ນທ້ອງຖິ່ນ.
ທີ່ກອງປະຊຸມໄດ້ມີການນໍາສະເໜີບັນດາກິດຈະກໍາ, ພາລະບົດບາດ ແລະ ໜ້າວຽກຂອງແຕ່ລະຂະແໜງການ, ໜ່ວຍງານ ແລະ ໄດ້ມີການສົນທະນາ, ປຶກສາຫາລື ແລະ ເຈາະຈິ້ມຢ່າງກົງໄປກົງມາ ໃນນັ້ນ ປະກອບມີ:
- ວຽກງານກະສິກໍາ ແລະ ປັບປຸງຊີວິດການເປັນຢູ່
- ວຽກງານໂພຊະນາການ ແລະ ພັດທະນາຊຸມຊົນ
- ວຽກງານວິສະວະກໍາ
- ວຽກງານບໍລິຫານ-ການເງິນ
- ວຽກງານຈັດຊື້-ຈັດຈ້າງ
- ວຽກງານຕິດຕາມ-ປະເມີນຜົນ
- ແລະ ແຜນການປະຈໍາປີ 2020
